ЕИ машҳур россиялик телебошловчиларни санкция рўйхатига киритди

Европа Иттифоқи Россиянинг Украинага қарши кенг кўламли ҳарбий ҳужум бошланганидан қарийб тўрт йил ўтиб, бир қатор машҳур россиялик телебошловчиларга нисбатан шахсий санкциялар жорий қилди.

Фото: Sputnik/Mikhail Klimentyev/Kremlin via REUTERS

Улар орасида Биринчи каналдаги “Время” телекўрсатуви бошловчиси Екатерина Андреева, шунингдек “Россия 1” телеканалидаги “Москва. Кремль. Путин” дастури бошловчиси Павел Зарубин ҳам бор. Брюсселнинг 29 январ, пайшанба куни ЕИ Расмий журналда эълон қилинган қарорига кўра, жазо чоралари санкция рўйхатидаги шахсларнинг Евроиттифоқ давлатларига киришини тақиқлаш ва уларнинг Европа банкларидаги активларини музлатишни назарда тутади.

Андреева бўйича асослантиришда у “Украинага қарши уруш ҳақида мунтазам равишда дезинформация ва пропаганда тарқатиши”, Россия армиясини ва сепаратист тузилмалар — “ДХР” ва “ЛХР” деб аталувчи ташкилотларни қўллаб-қувватлаши қайд этилган. Зарубин эса Владимир Путин кун тартибига “эксклюзив кириш имконияти”га эга шахс сифатида тавсифланган. ЕИ ҳужжатида Павел Зарубин тўлиқ кўламли ҳужум бошланганидан кейин Путиндан биринчи бўлиб интервю олгани, мунтазам равишда дезинформация тарқатиши, 2025 йилда эса Россия президенти билан “Прямая линия” (“Тўғридан тўғри мулоқот”) дастурида бошловчи бўлгани таъкидланган.

Андреева ва Зарубиндан ташқари, ЕИ санкцияларига спорт шарҳловчиси ва Бутунроссия давлат телевидение ва радиоэфир компанияси (ВГТРК) бош директори маслаҳатчиси Дмитрий Губерниев, “Россия” телеканалидаги “Вести” дастури бошловчиси Мария Ситтел, шунингдек рэп ижрочи Роман Чумаков (Рома Жиган номи билан танилган) ва балетмейстер Сергей Полунин ҳам тушди.

Рўйхатдаги барча шахсларга Россия ҳукумати томонидан олиб борилаётган, ЕИ ва Украинада “ахборотни манипуляция қилиш” орқали демократия, қонун устуворлиги, барқарорлик ва хавфсизликни “сусайтирувчи ёки унга таҳдид уйғотувчи” ҳаракатлар ва сиёсатни “амалга ошириш, қўллаб-қувватлаш ва ундан фойда кўриш” учун жавобгарлик юкланади.

2022 йил 24 феврал куни Евроиттифоқ Россия ТИВнинг расмий вакили Мария Захарова, Russia Today телеканали бош муҳаррири Маргарита Симонян ва телебошловчи Владимир Соловёвга қарши санкциялар киритган эди. ЕИ ҳужжатида айтилишича, Захарова “Россия қўшинларининг Украинага киритилишига кўмаклашган”, Симонян эса “ДХР” ва “ЛХР” деб аталувчи тузилмалар ҳаракатларига нисбатан “ижобий муносабат” шаклланишига ҳисса қўшган, Соловёв эса “Украинага нисбатан ўта душманлик муносабати”да айбланган. Шу куни Евроиттифоқ Давлат думасининг 351 депутатига, шунингдек яна 27 нафар жисмоний шахс ва юридик шахсга нисбатан ҳам санкциялар қўллаган.