Столтенберг Украина-НАТО комиссияси йиғилишини ўтказади

Йенс Столтенберг апрель ойида Украина-НАТО комиссиясининг йиғилишини ўтказиш ниятида. Венгрия бунга эътироз билдирди ва Киев Украина ғарбидаги венгер озчилигининг ҳуқуқларини поймол қилаётганини таъкидлади.

Фото: AP

НАТО бош котиби Йенс Столтенберг 2017 йилдан бери илк бор НАТО-Украина комиссиясининг вазирлар йиғилишини ўтказмоқчи. Бу ҳақда у 21 март, сешанба куни Брюсселда айтди. Венгрия учрашувга эътироз билдирмоқда: Будапештга кўра, Киев Украина ғарбидаги венгер озчилигининг ҳуқуқларини поймол қилмоқда.

Йенс Столтенберг Венгрия томонидан Украинадаги озчиликлар ҳуқуқларини ҳимоя қилиш бўйича кўтарилган масалаларни ҳурмат қилишини ва «доимо консенсусга эришишга ҳаракатда эканини» таъкидлади. Бироқ давлатлар бирдамликка эриша олмаса, НАТО бош котиби бундай йиғилишларни чақириш ҳуқуқига эга ва у бундан фойдаланишни режалаштирмоқда, деди Столтенберг. У Украина-НАТО комиссияси Украинани қўллаб-қувватлашни намойиш қилиш платформаси эканлигини таъкидлади.

Украина-НАТО комиссиясининг биринчи йиғилиши апрель ойида НАТО ташқи ишлар вазирларининг Брюсселдаги йиғилиши доирасида бўлиб ўтиши мумкин. Бундан ташқари, Йенс Столтенберг июль ойида Шимолий Атлантика альянсидаги иттифоқчилар етакчилари Володимир Зеленский билан НАТОнинг Вилнюсдаги саммити вақтида учрашишини истисно қилмади.

Украина-НАТО комиссиясининг йиғилиши охирги марта 2017 йилда бўлиб ўтган. Шундан сўнг Венгрия кейинги саммитларни блоклаб қўйишини маълум қилди. Бунга Украинадаги таълим тўғрисидаги қонун сабаб бўлди, у миллий озчиликлар тилларида мактаб дарсларини чеклайди. Венгрия ташқи ишлар вазири Петер Сийяртонинг сўзларига кўра, Будапешт ҳамон комиссия йиғилишига қарши.