Бахмутдаги «Да Винчи бўрилари» ва Запорижжя областига тушган авиабомба. Уруш суратлари

Украинада урушнинг 405-куни ўтди. Асосий маълумотлар:

• Петербургдаги портлашга алоқадорликда гумонланиб қўлга олинган Даря Трепова икки ой муддатга — 2 июнга қадар ҳибс қилинди. Кафедаги портлаш оқибатида «военкор» Владлен Татарский ҳалок бўлиб, яна 33 киши яраланган.
• Бу портлаш учун жавобгарликни «Миллий республика армияси» ўз зиммасига олди. «Бу акцияни биз мустақил тарзда тайёрладик ва амалга оширдик, бизда ҳеч қандай алоқалар йўқ ва ҳеч қандай хорижий тузилмалардан ёки махсус хизматлардан ёрдам олмаганмиз», — дейилган ташкилот баёнотида.
• Нижний Тагилда ФХХ мудофаа-саноат комплекси корхонасида ишловчи эр ва хотинни Украина фойдасига жосуслик қилишда айблаб қўлга олди. Улар «давлатга хиёнат»да айбланмоқда.
• АҚШ Украинага 2,6 миллиард долларлик янги ҳарбий ёрдам пакетини эълон қилди.
• Россия қўшини 4 апрелга ўтар кечаси Одесса областига Shahed камикадзе дронлари билан ҳужум қилди. Одесса ҳарбий маъмуриятига кўра, ҳаво ҳужумидан мудофаа тизими 17 дрондан 14 тасини уриб туширган.

Кун кадри. Часив Ярдаги украин аскари

Бахмутда украинларнинг «Волки Да Винчи» батальони жангчилари

«Волки Да Винчи» (Да Винчи бўрилари) — Украина ҚК қуруқлик қўшинлари 1-алоҳида механизациялашган батальони бўлиб, 2014 йилда штурмчи рота сифатида ташкил топганди. Батальон бундай номни ўз командири —  «Да Винчи» лақабли кўнгилли Дмитро Коцюбайло шарафига олган, The New York Times нашрининг 2021 йилдаги мақоласида ёзилишича, у Авдийивкадаги офисида қўлга ўргатилган бўри сақлаган. 2021 йилда Коцюбайло ҳаётлигида Украина Қаҳрамони унвонини олган илк кўнгилли бўлганди.

Коцюбайло 7 март куни Бахмут учун жанглар чоғида ҳалок бўлди. Унинг ўлимига муносабат билдирар экан, Володимир Зеленский «Да Винчи»ни «жасорат рамзи бўлган инсон» деб атади. Украинанинг NV нашри ёзишича, жангчининг Киевдаги дафн маросимига минглаб кишилар келган, улар қаторида Украина президентидан ташқари Финландия бош вазири Санна Марин, Украина қуролли кучлари бош қўмондони Валерий Залужний ҳамда мудофаа вазири Олексий Резников бор эди. Коцюбайлонинг ўлимидан кейин батальонга ким раҳбарлик қилаётгани маълум эмас.

«Волки Да Винчи» жангчилари Бахмутни қандай ҳимоя қилаётгани қуйидаги суратларда.

Ҳорливка яқинидаги Нью-Йорк қишлоғи атрофида украин позициялари

Нью-Йорк посёлкаси (2021 йилга қадар Новгородское деб аталган) фронтбўйи шаҳар ҳисобланган, россиялик ҳарбийлар 2014 йилдаёқ эгаллаб олган Ҳорливка шаҳридан тахминан 30 километр масофада жойлашган. Нью-Йоркнинг ўзи Украина армияси назоратида — ва РФ армияси томонидан мунтазам равишда ўққа тутилади.

Запорижжя областидаги авиабомба

Ўлдирилган «военкор» Владлен Татарский Донецкдаги билбордда