Венгрия ташқи ишлар вазири Москвада энергетика масаласини муҳокама қилди

Музокаралар мавзулари орасида Венгрияга «Турк оқими» орқали газ ва «Дружба» қувури орқали нефть етказиб бериш ҳам бор. Петер Сийяртонинг таъкидлашича, келаси қиш бундан ҳам қийин бўлади.

Венгрия ташқи ишлар вазири Петер Сийярто 11 апрель, сешанба куни Москвага келди ва у ерда Россия бош вазири ўринбосари Александр Новак билан Венгрияга «Турк оқими» газ қувури орқали газ ва «Дружба» нефть қувури орқали нефть етказиб бериш масалаларини муҳокама қилди. Сийяртонинг сўзларига кўра, келгуси қиш Европа учун жуда иссиқ бўлган олдингисига қараганда жиддийроқ синов бўлиши кутилмоқда. 

«Халқаро энергетика агентлиги Хитой иқтисодиёти қайта тикланиши туфайли энергияга бўлган талабнинг кескин ортиши ва Европа энергетика инфратузилмаси ривожланишининг ўта секин суръати туфайли келаси қишда ҳақиқий қийинчиликлар пайдо бўлишидан аниқ огоҳлантирди», — деди Венгрия ташқи ишлар вазири. 

Унинг таъкидлашича, «Венгриянинг энергия таъминоти хавфсизлиги газ, нефть ва ядро ёқилғисини узлуксиз ташишни талаб қилади».

«Мана шу уч шартни бажариш учун Венгрия-Россия энергетика ҳамкорлиги узлуксиз бўлиши керак. Гап сиёсий дидда эмас, физикада», деб ёзди Сийярто ўзининг Facebook саҳифасида.