Россия Украинадаги урушда ҳалок бўлганлик фактини тан олиш қоидаларини соддалаштиради

11 апрель, сешанба куни Россия Давлат думаси Украинадаги урушда қатнашган россиялик ҳарбий хизматчиларни ҳалок бўлган ва бедарак йўқолган деб тан олиш тартибини соддалаштирувчи қонунларни иккинчи ва учинчи ўқишда қабул қилди.

Биринчи қонун лойиҳасига кўра, муддатли ҳарбий хизматни ўташ чоғида ёки сафарбарлик даврида, ҳарбий ҳолат ва уруш даврида ҳалок бўлган ҳарбий хизматчининг ўлими тўғрисида гувоҳнома бериш тартиби соддалаштирилади. Уни нафақат тиббий ташкилотлар, балки бошқа ваколатли шахслар ҳам беришлари мумкин.

Бундан ташқари, ҳарбий хизматчини бедарак йўқолган ёки ўлган деб эътироф этиш тўғрисида ариза бериш учун ҳарбий ҳаракатлар тугаган кунни кўрсатиш керак бўлган қоидани ўз кучини йўқотган деб топиш таклиф қилинмоқда.

Яна бир қонун лойиҳаси Украинадаги урушда қатнашган, «махсус ҳарбий операция» зонасида хизмат қилган ёки яшовчи шахсларга нисбатан Россия Фуқаролик кодексининг фуқарони бедарак йўқолган деб топиш ёки ҳарбий ҳаракатлар муносабати билан вафот этгани туфайли бедарак йўқолган деб эълон қилиш бўйича амалдаги қоидаларини қўллашни таклиф этади. 

Ҳужжат кучга киргандан сўнг, аскар ўлган деб эълон қилиниши учун унинг қўмондонининг тегишли аризаси етарли бўлади. «Агар бунинг тўғридан тўғри гувоҳлари бўлмаса-ю, лекин шахс бедарак йўқолган бўлса, уни бедарак йўқолган деб тан олиш учун олти ойдан кўп бўлмаган вақт кетади», деди ташаббус муаллифларидан бири Андрей Турчак. Россиянинг амалдаги қонунчилигига кўра, ҳарбий хизматчини бедарак йўқолган деб тан олиш учун ҳарбий ҳаракатлар тугаганидан кейин икки йил кутиш керак.