Украина Wildberries омборларига зарба берди - фотолар

Украина дронлари 18 июлга ўтар кечаси Россиянинг бир қанча регионларига ҳужум қилди, хусусан, Wildberries маркетплейсининг Москва ва Тамбов областларидаги логистик марказлари зарба остида қолган. 

Тамбов областининг Котовск шаҳрида Wildberries омбори ҳужумга учраган. Ҳудуд губернатори Евгений Первишов ҳаво ҳужумидан мудофаа тизимлари «ишлагани», шаҳарга киришда 28 дрон уриб туширилганини маълум қилган. «Агар улар нишонга етиб бора олганида, тинч аҳоли орасида қурбонлар сони анча кўп бўлиши мумкин эди», – дея қўшимча қилган у. 

Сўнгги маълумотларга кўра, Котовскдаги омборга ҳужум оқибатида тунги сменада ишлаган ишчилардан етти нафари ҳалок бўлган. Яна 25 киши жароҳатланган, шундан 23 нафари шифохонага ётқизилган. Улардан бирининг аҳволи ўта оғир, яна олти кишиники оғир деб баҳоланмоқда.

Шунингдек, Wildberries’нинг Москва области Электростал шаҳридаги омбори ҳам ҳужум остида қолган. Бу ерда бир киши ҳалок бўлиб, 37 киши жароҳатланган, шундан саккиз нафарининг аҳволи – оғир, 23 нафариники – ўртача оғирликда деб баҳоланган.

Бундан ташқари, дронлар Ногинскдаги нефт базасига ҳужум қилган, хавфлик нуқтайи назаридан унинг яқинидаги туғуруқхона эвакуация қилинган. 

Widlberries’нинг Москва областидаги логистик марказига ҳужум оқибатлари акс этган видео ва фотолар эълон қилинган. 

Astra нашри ўқувчиларига кўра, Москва областида ёнаётган объектлардан кўтарилган тутун устунлари 50 километр масофадан ҳам кўринмоқда.

Украина президенти Володимир Зеленский бу зарбалар Россиянинг Украинадаги инфратузилма объектларига ҳужумларига жавоб бўлганини айтиб, Wildberries омборларида дронлар тайёрлашда иштиладиган қисмлар сақланганини маълум қилди.