Xiaomi Украинада «уруш ҳомийлари» рўйхатига киритилди

Компания уруш бошланганидан кейин Россияни тарк этмагани учун шу рўйхатга киритилган.

Фото: Getty Images

Украина коррупциянинг олдини олиш миллий агентлиги (НАПК) Хитойнинг Xiaomi компаниясини «урушнинг халқаро ҳомийлари» рўйхатига киритди. Бу ҳақда агентлик сайтида эълон қилинди.

Бундай қарорга «компаниянинг уруш бошланганидан кейин нафақат Россиядаги фаолиятини давом эттиргани», балки ушбу мамлакатда смартфонлар савдоси бўйича ҳамон етакчи бўлиб қолаётгани сабаб бўлган.

Агентликнинг таъкидлашича, Xiaomi 2022 йилнинг баҳоридан бери Россияда маркетинг фаолиятини олиб бормаган бўлса-да, Россия бозоридан чиқиб кетиш режаларини эълон қилмаган.

Xiaomi дунёдаги энг йирик смартфон ишлаб чиқарувчилардан биридир.

Аввалроқ НАПК 20 та компанияни, жумладан Франциянинг Auchan, Leroy Merlin, Bonduelle, Американинг Procter&Gamble ва бошқа бир қатор компанияларини шу рўйхатга киритган эди.