Финландиянинг Москвадаги элчихонасига оқ кукунли мактуб юборилди 

Финландиянинг Россиядаги элчихонаси учта хат келиб тушгани, улардан бирида оқ кукун борлиги сабабли Россия Ташқи ишлар вазирлигига мурожаат қилди. Бу ҳақда РИА Новости хабар берди. 

Қайд этилишича, хатлар элчихона биносига 13 апрель куни етказилган. Улардан биринчисини очиш пайтида оқ кукун аниқланган. Шундан сўнг, қолган конвертлар очилмасдан қолдирилган. Хатларни ким юборгани номаълум. 

«Финландия Ташқи ишлар вазирлигининг хавфсизлик қоидаларига мувофиқ, ушбу мактублар Россия расмийларига топширилди, улар ушбу масалани қўшимча ўрганмоқда», дейилади Финландия элчихонаси хабарида. 

Дипломатик департаментнинг таъкидлашича, улар воқеадан сўнг дарҳол Россия Ташқи ишлар вазирлигига мурожаат қилган. 

Аввалроқ Франциянинг Москвадаги элчихонасига суяклар солинган жўнатма юборилгани хабар қилинганди. Қутини сканерлаш вақтида унинг ичидан майда ҳайвон ёки қуш суяклари топилган. Улар қутини очмай, элчихона ташқарисига олиб чиққан. Жўнатма Қримнинг Судак шаҳридан юборилгани аниқланган.