Қўшимча функционаллар
-
Тунги кўриниш
Венгрия Украина қишлоқ хўжалиги маҳсулотлари транзитини сақлаб қолишга ваъда берди
Венгрия, Будапешт томонидан импортга вақтинчалик тақиқ жорий қилинганига қарамай, Украина қишлоқ хўжалиги маҳсулотларининг транзитини таъминлашда давом этади. Бу ҳақда Украина Аграр сиёсат ва озиқ-овқат вазирлиги идора бошлиғи Николай Солскийнинг венгриялик ҳамкасби Иштван Над билан онлайн учрашуви якунлари бўйича хабар берди.
Вазирликнинг Facebook'даги саҳифасида эълон қилинган баёнотда айтилишича, томонлар Украина қишлоқ хўжалиги маҳсулотларининг Венгрияга экспорти билан боғлиқ вазиятни муҳокама қилган.
Солский Украина қишлоқ хўжалиги маҳсулотларини экспорт қилиш бўйича келишувларга эришиш учун музокараларни давом эттириш зарурлигини ва бир томонлама қарорларнинг қабул қилиниши мумкин эмаслигини таъкидлади.
«Ўз навбатида, Венгрия қишлоқ хўжалиги вазири Украина қишлоқ хўжалиги маҳсулотлари учун транзит келажакда ҳам давом этишига ишонтирди», дейилади хабарда.
Европа Иттифоқига аъзо давлатларнинг савдо соҳасидаги бир томонлама ҳаракатлари қабул қилиниши мумкин эмас. Бу ҳақда 16 апрель куни Еврокомиссия вакили маълум қилди. Унинг баёноти Полша ва Венгрия маҳаллий қишлоқ хўжалиги тармоқларини ҳимоя қилиш учун Украинадан ғалла ва бошқа озиқ-овқат импортини тақиқлашини эълон қилганидан кейин эълон қилинди.
Брюссел «Полша ва Венгрия баёнотлари»дан хабардор. «Шу нуқтайи назардан, савдо сиёсати Европа Иттифоқининг мутлақ ваколати доирасида эканлигини ва шунинг учун бир томонлама ҳаракатларга йўл қўйиб бўлмаслигини таъкидлаш зарур», — деди ЕИ вакили.
«Бундай қийин пайтларда Европа Иттифоқи доирасидаги барча қарорларни мувофиқлаштириш ва уйғунлаштириш ниҳоятда муҳим», — дейилади баёнотда.
