АҚШ Адлия вазирлиги Россияга қарши санкцияларнинг амалга оширилиши устидан назоратни кучайтирди

АҚШ Адлия вазирлигининг KleptoCapture номи билан танилган тезкор ишчи гуруҳи раҳбари Эндрю Адамс Bloomberg агентлигига берган интервьюсида Вашингтон Россиянинг Украинадаги ҳарбий амалиётига жавобан жорий этилган санкциялардан қочишнинг олдини олиш усуллари ҳақида гапирди.

Адамснинг сўзларига кўра, Адлия вазирлиги хориждаги инвестиция маслаҳатчилари, ҳеж-фондлари, юридик фирмалар ва хусусий инвестиция компанияларига эътибор қаратган. Аввал уларнинг ҳеч бири текширилмаган.

Шу билан бирга, санкцияланган товарлар билан операцияларни ниқоблаш учун криптовалюталардан фойдаланиш имкониятлари ўрганилмоқда, бадавлат россияликларнинг активларини яширган компаниялар ва шахсларни аниқлаш ва жиноий жавобгарликка тортиш учун янги ва махфий тактикалардан фойдаланилмоқда, деди Эндрю Адамс.

«Санкция остидаги олигархларга хизмат кўрсатадиган ва уларнинг молиявий тизимларидан фойдаланиш имкониятини берадиган юрисдикциялар бор ва баъзида улар шундай ишлайдики, биз ҳақиқий тергов ўтказа олмаймиз», деди ишчи гуруҳ раҳбари.

У ўз гуруҳи эътибор қаратган компаниялар, шахслар ёки ҳудудларни номлашни истамади.

KleptoCapture 2022 йил март ойида ҳарбий амалиётга жавобан санкцияларни амалга ошириш учун ташкил этилган.

Шунингдек, тезкор гуруҳ иши суғурта компаниялари томонидан бадавлат россияликлар фойдаланадиган самолётлар учун полисларнинг бекор қилинишига олиб келди. Натижада улар деярли парвоз қилиш имкониятини йўқотди.

Яқинда АҚШ Конгресси Адлия вазирлигига санкциялар бузилиши туфайли ҳибсга олинган активлардан тушган маблағларни Украинага ўтказиш ҳуқуқини берди. Аммо бу экспорт назорати бузилганлиги сабабли ҳибсга олинган самолётлар каби активларга тааллуқли эмас. Эндрю Адамс 5,4 миллион долларга яқин пул ўтказишга рухсат берилганини айтди ва буни «денгиздан томчи» деб атади.