Францияда навбатдаги норозилик намойишлари кастрюлька ва товалар билан ўтказилди

Францияда 24 апрель, душанба куни Эммануэл Макрон иккинчи муддатга президент этиб сайланганининг бир йиллиги муносабати билан бўш кастрюлькалар кўтариб олинган намойишлар бўлиб ўтди. Мамлакат бўйлаб минглаб одамлар пенсия ислоҳотига қарши намойишларда қатнашди. Намойишчилар ҳукуматнинг бир қанча аъзолари иш сафарларини тўхтатиб қўйган, деб ёзади Le Figaro.

Шу тариқа, таълим вазири Пап Ндьяй бино ташқарисида намойишчилар борлиги сабабли Лиондаги муассасалардан бирига ташрифини ўзгартирди. Парижга қайтиб келгач, амалдор поездда вақтинча тўсиб қўйилди – бир неча ўнлаб намойишчилар платформада «қозон-товоқлар концерти» уюштиришди. 

Болалар бўйича давлат котиби Шарлот Кобел намойишлар туфайли Сен-Морисдаги касалхонага режалаштирилган ташрифини бекор қилди. Маданият вазири Рима Абдул-Малакни Париж театрларидан бири олдида кастрюлькалар билан кутиб олишди. Худди шу тарзда намойишчилар адлия вазири Эрик Дюпон-Моретти ва соғлиқни сақлаш вазири Франсуа Браун билан учрашди. 

Францияда пенсия ёшини 62 дан 64 га оширишни ўз ичига олган пенсия ислоҳотига қарши норозилик намойишлари лойиҳа расман жамоатчиликка тақдим этилган январь ойи ўрталаридан бери давом этмоқда. Энг йирик норозилик намойишларида юз минглаб одамлар қатнашди, иш ташлашлар туфайли рейслар бекор қилинди, шаҳарлараро поездлар қатнови тўхтатилди, чиқинди йиғишда жиддий муаммолар юзага келди. Шунга қарамай, Макрон 15 апрель куни баҳсли қонунни имзолади.