Қўшимча функционаллар
-
Тунги кўриниш
Зеленский: ЕКПА резолюцияси Россияни Украинадаги жиноятлар учун жазолашга ёрдам беради
Украина президенти украиналик болаларнинг Россияга зўрлик билан олиб кетилиши геноцид деб тан олинувчи ЕКПА резолюциясининг қабул қилинишини олқишлади.
Европа Кенгаши Парламент ассамблеясининг (ЕКПА) Страсбургдаги сессиясида Россия томонидан украиналик болаларни депортация қилишда геноцид аломатлари борлигини белгиловчи резолюциянинг қабул қилиниши Россия ва унинг президентини Украинадаги жиноятлар учун жазолашга ёрдам берадиган “муҳим сиёсий натижа”дир. Бу ҳақда Украина президенти Володимир Зеленский 27 апрел, пайшанба куни анъанавий кечки видеомурожаатида айтиб ўтди.
"Бу бизнинг қитъамиздаги давлатларни бирлаштирган бундай юксак халқаро ташкилот даражасида ушбу фактнинг биринчи марта эътироф этилишидир. Амалий нуқтайи назардан, бу қарор Россия ва унинг расмийларини, жумладан, давлат раҳбарини айнан геноцид, Украинага қарши геноцид сиёсати учун жавобгарликка тортиш бўйича глобал ишимизга сезиларли ёрдам беради", деди у.
Зеленскийнинг сўзларига кўра, украиналик болалар депортацияси Россиянинг Украина халқининг ўзига хослигини йўқ қилишга, украиналиклар моҳиятини йўқ қилишга уринишининг “яхши ўйланган” элементларидан биридир. "Бу Россия расмийлари томонидан қасддан содир этилган геноцид жинояти - буни сиёсий ва ҳуқуқий жиҳатдан мана шундай квалификация қилиш керак", деди давлат раҳбари.
Россия-Украина уруши
