Пригожин "ВДВ"нинг Бахмутдаги манёврини душмандан қочиш деб атади

Унинг сўзларига кўра, “душман қаттиқ қаршилик кўрсатмоқда, ҳар бир уй, ҳар бир кириш жойи, ҳар бир квадрат метр учун жанглар давом этмоқда” – гарчи Украина Қуролли кучлари шаҳарнинг бор-йўғи “бир-икки фоиз ҳудудини” эгаллаган бўлса ҳам.

Пригожиннинг сўзларига кўра, Россия Мудофаа вазирлигининг “душман учун қулай чизиқ”ни эгаллаб олган ҳаво-десант қўшинлари ("ВДВ") бўлинмаларининг нотўғри қарорлари туфайли Украина позицияларини ўраб олишнинг иложи йўқ. 

“Барча ҳарбий дарсликларга ёзиб қўйиладиган ушбу янги стратегик манёвр “душмандан бир зумда, қатъий қочиш” деб номланади”, — деди Пригожин Telegram’даги аудиомурожаатида ғазаб билан.

"Вагнер" ХҲК асосчиси Евгений Пригожин Бахмутдаги қийин вазият ва Украинанинг кутилаётган қарши ҳужуми ҳақидаги хабарлар фонида Кремл ва Россия Мудофаа вазирлигини фаол танқид қилмоқда. 

Аввалроқ, Пригожин ўз айбловларида "ҳаммаси яхши деб ўйлаётган", аммо "аҳмоқ" бўлиб чиқиши мумкин бўлган "бахтли чол" ҳақида айтиб ўтганди. У айнан кимни назарда тутганини очиқламаган.