Швейцария парламенти Украинага қурол-яроғ бериш ҳақидаги қонунни рад этди

Берндаги парламентда учинчи давлатларга Швейцарияда ишлаб чиқарилган қуролларни Киевга топширишга рухсат берувчи қонун лойиҳаси муваффақиятсизликка учради. Аксарият депутатлар бунга қарши овоз берди.

Фото: Keystone / Alessandro Della Valle

Швейцария парламенти – Миллий кенгаш 1 июн, пайшанба куни учинчи давлатларга Швейцарияда ишлаб чиқарилган қуролларини Украинага топширишга рухсат берувчи Lex Ukraine деб номланувчи қонун лойиҳасини рад этди. Парламент расмий сайтининг хабар беришича, 98 депутат ҳужжатга қарши овоз берган бўлса, 75 нафари уни ёқлаб чиқди.

Аввалроқ Берндаги ҳукумат (Федерал кенгаш) Германия, Испания ва Даниянинг Украинага қурол топшириш сўровларини рад этиб, мамлакатнинг уруш материаллари тўғрисидаги қонунига асосланиб, уруш зоналарига қурол етказиб беришни тақиқлаган эди.

Швейцария Федерал кенгаши мамлакатда ишлаб чиқарилган қуролларни фақат алоҳида ҳолларда, масалан, БМТ Хавфсизлик кенгаши Украинадаги урушни қоралаган тақдирдагина реэкспортга рухсат бериши мумкин. Бироқ, бу вариант истисно қилинган, чунки Россия БМТ Хавфсизлик кенгашида вето ҳуқуқига эга.