БМТ: Ҳар куни урушларда 20 нафар бола майиб бўляпти ва вафот этяпти

ЮНИСЕФ маълумотларига кўра, 2005 йилдан буён дунё бўйлаб камида 120 000 бола можароларда майиб бўлган ёки ўлдирилган. Бу кунига 20 нафар болага тўғри келади, дея маълум қилди БМТ Болалар жамғармаси 5 июн, душанба куни Ослода қуролли можароларда болаларни ҳимоя қилишга бағишланган халқаро конференция бошланган куни.

“Охир-оқибат, ҳар бир уруш - бу болаларга қарши урушдир”, деди ЮНИСЕФ ижрочи директори Кэтрин Рассел. Унинг сўзларига кўра, халқаро ҳамжамият урушларда болаларни яхшироқ ҳимоя қилиш учун ҳали ҳам ҳаракат қилмаяпти, аммо у буни қандай қилишни билади.

ЮНИСЕФ Африка, Осиё ва Лотин Америкасидаги 30 дан ортиқ можаролар ҳақида маълумот тўплаган. Ушбу инқирозлар даврида болалар ҳуқуқларининг 315 та жиддий бузилиши қайд этилган. Хусусан, можароларда камида 105 минг боладан аскар сифатида фойдаланилган, 16 мингдан ортиқ қиз ва ўғил болалар жинсий зўравонликка учраган, 32,5 мингдан ортиқ бола низолашаётган томонлар вакиллари томонидан ўғирланган. Шу билан бирга, зарар кўрган болаларнинг ҳақиқий сони анча юқори, дея қўшимча қилди ташкилот. Бундан ташқари, БМТ мактаблар ва шифохоналарга 16 мингдан ортиқ ҳужумни қайд этган.

ЮНИСЕФ халқаро ҳамжамиятни урушда болаларни ҳимоя қилиш бўйича мавжуд халқаро қонунлар ва меъёрларга риоя қилишга чақирди. Бошқа нарсалар қаторида, аҳоли турар жойларида портловчи қуроллардан фойдаланишни тақиқлаш зарур, дея чақириқ билан чиқди ташкилот. Болаларга қарши жиноят содир этганлар жавобгарликка тортилиши керак. Бундан ташқари, болаларни ҳимоя қилиш бўйича чора-тадбирларни қабул қилиш учун зарур молиявий ресурсларни ажратиш керак, дейилади ҳужжатда.