Аргентинадаги ёшлар чемпионатининг 10 юлдузи. Уларнинг кўпчилиги аллақачон топ-клубларда

20 ёшгача бўлган футболчилар орасидаги жаҳон чемпионати ҳам якунланди – унда Уругвай жамоаси ғолиб чиқди. Бундай турнирларда ёшлар ўзларини тўлақонли равишда намоён этишади, кейин эса топ-клубларга ўтади ёки аллақачон бундай клубларда бўлишса, кўпроқ ўйин амалиётига эга бўлади. Хўш, якунланган турнирда кимлар порлади?

Чезаре Казадей — 20 ёш, Италия

Бу йигит чиройли ўйин кўрсатди — U20 бўйича жаҳон чемпионатлари тарихида бир вақтнинг ўзида ҳам «Олтин бутса», ҳам «Олтин тўп»ни қўлга киритган олтинчи футболчи бўлди. Ушбу яримҳимоячи 7+2 кўринишидаги самарадорлик кўрсатди, Италия жамоаси финалга чиқиши учун барча ишни қилди.

Голлардан ташқари, Чезаре яримҳимоячиларнинг одатий функцияларини бажаришда давом этди — классик олтилик ёки бокс-ту-бокс вазифасини бажарди: баланд бўйли, чидамли, яккакурашлардан чўчимайдиган ва улкан гавдасидан унумли фойдаланади. Казадейнинг ўзи ҳам жисмоний имкониятлари — унинг асосий устунлиги эканини яширмайди: интервюларидан бирида бу борада афсонавий Никола Бертига ўхшашини айтган. У «Челси»га тегишли (ёшлар жамоасида ўйнайди) ва, афтидан, энди бу жамоада унга кейинги босқичга ўтиш учун барча эшиклар очилади. Унинг трансфер нархи 12 млн еврони ташкил этмоқда.

Томмазо Балданци — 20 ёш, Италия

Ушбу плеймейкер Чезаре билан биргаликда жаҳон чемпионатида рақибларга кун бермади. Улар жуда яхши боғлам ҳосил қилишди: жарима майдони ичида бир-бирини кўз юмган ҳолда ҳам топа олишарди. Масалан, Колумбия билан ўйинда дастлабки икки голни уришди (биттадан гол ва пас), иккинчи бўлимда эса дарвоза устуни учинчи гол урилишига йўл қўймади.

Томмазонинг яна бир муҳим шериги — Симоне Пафунди, у ҳам кичик жуссали, абжир, техникаси кучли ва ҳужумкорликка мойил. Турнирнинг Бразилияга қарши кечган биринчи ўйинида айниқса у билан яхши ҳужумлар уюштирилди: йигитлар тўпни анча орқароқда эгаллаб, жамоани олдинга бошлашди ва вазиятлар яратишди.

Балданци чизиқларни боғлади, дриблинглари билан рақибларни ортда қолдирди, ўрни келганда ўнг қанотга силжиди — шу ердан туриб асосий хавфни туғдирди. «Эмполи» футболчисига қарийб бир йилдан буён Италиянинг топ жамоалари қизиқиб келмоқда — жаҳон чемпионатидаги бундай иштирокидан кейин уни олиб кетишлари аниқ.

Алан Маттурро — 18 ёш, Уругвай

Турнирнинг «Кумуш тўп» соҳиби. Ақл бовар қилмас ҳимоячи — марказга ҳам улгуради, ҳужумга ҳам етиб боради. Унинг чап қанотдан ҳужумларга қўшилиши хавфли чиқарди, баъзида голга ҳам олиб келди — яримфиналда Исроил билан кечган ўйиндаги каби. Финалда ҳам у ишончли ҳаракат қилди, аммо бунда унинг марказий ҳимоядаги шериги Себастян Боселли ҳам беқиёс рол ўйнади. Уругвай бу жуфтлик туфайли олти ўйинда дарвозаси дахлсизлигини сақлаб қолди.

Даниэл Дага — 16 ёш, Нигерия

Бу жаҳон чемпионатининг кашфиёти. У ҳали 16 ёшда, аммо у порлай олди. Таянч яримҳимояси вакили Аргентина устидан тарихий ғалабани таъминлади — айнан у юлдузли таркибга эга рақиб ҳужумларини қайтарди: тўпни жарима майдонидан узоқлаштирди, бутун майдон бўйлаб югурди, исталган нуқтада тўп учун курашдан тўхтамади. Ёши ҳам, гавдаси ҳам кичик бўлишига қарамай, доимий равишда ўзининг катта ёшли рақибларини қийнади. Ва ўз ўйинидан роҳат олиб ҳаракат қилди.

Ҳозирча Даниэл Нигерия чемпионати аутсайдери сафида тўп сурмоқда, аммо, шубҳа йўқки, жаҳон чемпионатидан кейин унинг ҳаёти жиддий ўзгаради.

Диего Луна — 19 ёш, АҚШ

Америка жамоасининг муҳим футболчиси. Турнирда у «алдамчи тўққизлик» позициясида ҳаракат қилиб, 1+3 кўрсаткичини қайд этган ҳолда, жамоаси билан 1/4 финалга қадар етиб борди. Ўрта бўйли, аммо яхши тезликка эга, эпчил, ҳимоя чизиғини ёриб ўтади ва ҳужумни кескинлаштиради.

Энг ёрқин ўйини — 1/8 финалда Янги Зеландияга қарши ўйин бўлди: захирадан майдонга тушди ва икки ассист амалга ошириб, ҳужумни бошқарди. Марказий ҳимоячилар позициясигача қайтиб, тўпни олди ва қанотлар орқали ҳужумларни ривожлантирди. Бунда АҚШ схемаси ҳам қўл келди: чап қанот вингери Кейд Кауэлл Лунанинг позициясига ўтди, вингернинг ўрнини эса Кейлеб Уайли эгаллади — бу ҳолатда Диего майдон бўйлаб эркин ҳаракатланиши ва тўпни олдинга олиб бориши мумкин эди.

Луна «Андерлеҳт»да тажриба оширган ва «Барса»нинг Америкадаги академиясида тарбияланган, аммо ҳозирда «Реал Солт-Лейк»да жавлон урмоқда — МЛС чемпионати ўйинларида захирадан майдонга чиқади. Бу турнирдан кейин унинг порлоқ истиқбол кутаётганини тахмин қилиш мумкин.

Оскар Кортес — 19 ёш, Колумбия

Турнирда 4 гол уриб, 2 голга узатма берди. Ўзининг олдинга чиқиши билан майдоннинг учинчи қисмидаги вазиятни кескинлаштирувчи вингер. Вазиятга қараб ҳужумчи ортида ҳам, «алдамчи тўққизлик» позициясида ҳам, ҳатто ўнг қанотда ҳам ҳаракатланиши мумкин бўлган универсал. Вазиятни яхши ҳис қилади ва вақтида финт ижро этишга киришади. Аммо энг муҳим фазилати — кескинлаштирувчи паслари: ҳамиша бўш ҳудудлар ва шерикларини вақтида кўра олади.

Ҳозирда Колумбиянинг «Милонариос» клубида ўйнамоқда ва бу мавсумда у 17 ўйинда 6+3 кўрсаткичига эришган — вингер учун ажойиб натижа. Афтидан, Оскар тез орада кўтарилади.

Максимо Перроне — 20 ёш, Аргентина

У аллақачон юлдузга айланганди — қишда уни «Манчестер Сити» 9 млн евро эвазига трансфер қилган. Ҳақиқий диспетчер ва ҳужумларни бошлаб берувчи.

Муҳим устунлиги — аниқ узатмалари. Ҳужумларни ташкил этишда жамоада унга тенг келадигани йўқ — Перроне исталган жойига тўпни етказиб бера олади. Ҳатто вертикал узатмалар билан ҳужумларни бошлаб бериш учун марказий ҳимоячи позициясига ҳам тушиши мумкин. Бир ўйинда у беш марта ҳал қилувчи узатма муаллифига айланди.

Фабрисио Диас — 20 ёш, Уругвай

Ҳақиқий етакчи. Финалда айнан Фабрисио жамоани руҳий жиҳатдан ҳам, ўйин жиҳатидан ҳам олдинга бошлади: таянч яримҳимоячиси сифатида у ҳудудларни шериклари учун тозалади, биринчи пас билан ҳужумларни бошлаб берди, кўп ҳолларда иккинчи темпда ҳужумга қўшилди — шундай ҳужумлардан бирида тўпни эгаллаб олди ва узоқдан йўллаган зарбаси билан дарвоза устунини титратди. Жуда универсал футболчи. Тўқнашувларга боришдан чўчимайди. Ҳозирча Монтевидеонинг «Ливерпул» клуби учун ўйнамоқда

Себастияно Депланш — 20 ёш, Италия

Турнирнинг «Олтин қўлқоп» соврини эгаси. Уни олти ўйинда дарвозаси дахлсизлигини сақлаб қолган уругвайлик дарвозабон Рандалл Родригес қўлга киритиши кутилганди. Аммо жанубий америкаликларнинг бундай натижага эришиши — кўп жиҳатдан марказий ҳимоячиларнинг ишончли ўйини эвазига бўлди. Себастияно эса Колумбияга қарши ўйинда ҳам, финалда ҳам кўп бор қутқарди: бурчакдан йўлланган айланма зарбани тўса олди ва жамоани ўйинда қолдирди, ўйин охирида эса бешга бир вазиятда гол уришга йўл қўймади. Қолаверса, оёқлари билан яхши ўйнайди: Депланш кўпинча охирги ҳимоячи вазифасини бажарди, қисқа паслар амалга оширди ва босим остида тўпни узоқлаштирди.

Себастияно «Милан» тарбияланувчиси ҳисобланади, аммо ҳозирда C серия вакили «Тренто» дарвозасини қўриқламоқда. Кўтарилиш вақти келди.

Валентин Барко — 18 ёш, Аргентина

Ҳужумкор чап қанот ҳимоячиси. Бутун қанотни қамраб олади, якуний босқичда ўз рейдлари билан рақиб мудофаасини таҳликага солади. Қанотдан кескин узатмалар ва юқорига ошириб беришлар амалга оширади. Ўзбекистон билан ўйинда эса голли ассистни ҳисобига ёзиб қўйганди.

Барко ҳамиша жамоасига ҳужумга ўтиш учун бир лаҳзада қарор қабул қилиб, бир-икки тегинишда керакли узатмани амалга оширади. Шу билан бирга ҳимоядаги ишларига ҳам улгуради: жисмонан бақувват эмаслигига қарамай (бўйи 172 см) фаоллик билан тўқнашувга боради ва яккакурашларда ғолиб келади.

Барко «Боку» сафида ўйнамоқда, аммо жаҳон чемпионатидаги муваффақиятли иштирокидан кейин, Tuttosport хабарига кўра, «Ювентус»га ўтиши мумкин — туринликлар унинг шартномасида кўрсатилган бадал пулини тўлашга тайёр.