ЖЧ кундалиги. Яна фантастик ўйнаган Жуд, яна қийналган Аргентина ва Эмболода аҳмоқона қизил

Футбол бўйича жаҳон чемпионати чоракфинал босқичида қолган икки ўйинда ҳам жамоалар асосий вақтда масалани ҳал қила олишмади. Овертаймларда эса Англия Норвегияни (1:1, 2:1), Аргентина Швейцарияни (1:1, 3:1) мағлуб этди. Энди турнир ҳал қилувчи босқичга ўтди.

Стадионлар ташқарисида ҳам турнирга алоқадор воқеалар етарлича бўлмоқда: ҳужумчи Ҳаминтон Кампас ижтимоий тармоқлардаги ҳейтлар туфайли Колумбияга қайтишга қўрқмоқда, Тибо Куртуа эса Белгия миллий жамоасидаги фаолиятида танаффус қилди.

Аргентиналиклар мухлисларини қийнашда давом этмоқда

Аргентина – Швейцария 3:1
Голлар: Макаллистер, 10 (1:0). Ндой, 67 (1:1). Альварес, 112 (2:1). Л. Мартинес, 120+1 (3:1)
Аргентина: Э. Мартинес, Л. Мартинес, Ромеро (Отаменди, 106), Таляфико (Гонсалес, 78), Молина (Монтиэл, 85), Паредес (Лопес, 110), Фернандес (Алмада, 91), Макаллистер, де Паул (Л. Мартинес, 85), Алварес, Месси
Швейцария: Кобел, Элведи, Аканжи, Родригес (Эрай Жемерт, 90), Закариё (Яшари, 96), Фройлер (Варгас, 115), Жака, Ридер (Муҳайм, 86), Ндой (Видмер, 86), Соу (Амдуни, 86), Эмболо
Огоҳлантиришлар: Алмада, 97. Л. Мартинес, 98. Лопес, 114 – Эмболо, 44
Четлатиш: Эмболо, 72 (иккинчи сариқ)

Жаҳон чемпионати стартига қадар Аргентина ва Швейцария ўйини ким фаворит бўлиши савол туғдирмасди. Аммо амалда барчаси бошқача бўлиб чиқди – «Албиселесте» плей-офф босқичини шу қадар асабий ўтказмоқдаки, ушбу жамоа Мурат Якиннинг яхши шаклланган жамоага қарши қандай ҳаракат қилиши борасида қандайдир прогноз бериб бўлмасди. Фақат навбатдаги драма рўй беришини тахмин қилиш мумкин эди.

Кутилмаларга терс ўлароқ, Лотин Америкаси вакиллари ўйинни хотиржам бошлади ва 10-дақиқадаёқ бурчак зарбасидан кейин Алексис Макаллистер ҳисобни очди. Унга ушбу турнирнинг асосий қаҳрамонларидан бири Лионел Месси ассистентлик қилди.

Аргентина қарийб бир соат мобайнида ҳисобдаги устунликни сақлаб турди ва иккинчи голни уришга ҳам яқинроқ келди. Аммо Лионел Скалони бу сафар ҳам мухлисларини охирги дақиқаларга қадар ҳаяжонда ўтиришга мажбур қилди – иккинчи бўлим ўрталарида швейцарияликлар мувозанатни тиклашди. Ҳимоячи Дан Ндой чап қанотдан жарима майдонига бостириб кирди ва кучли зарбаси билан Эмилиано Мартинесни ожиз қолдирди.

Аммо европаликлар жамоаси мухлисларининг қувончи узоққа чўзилмади. 69-дақиқада ўйин тақдирини ўзгартириб юборган ғалати воқеа рўй берди: аввалига бош ҳакам аргентиналиклар яримҳимоячиси Паредес томонидан фол ишлатилганини қайд этиб, унга сариқ карточка кўрсатди. Аммо янги қоидалар бўйича вазиятга VAR аралашди ва ҳакамни монитор қаршисига чорлади.

Вазиятни кўриб чиққанидан кейин ҳакам Брелю Эмболо симуляция ишлатган деб топди ва Паредеснинг карточкасини бекор қилиб, швейцариялик ҳужумчига сариқ карточка кўрсатди, унинг учун бу ўйиндаги иккинчи сариқ карточка бўлди ва у жамоасини қийин аҳволда қолдириб, майдонни тарк этди.

Ҳолбуки, агар ҳакам ўшанда Паредесга сариқ карточка кўрсатмаганида, видеоҳакамлар вазиятга аралашмаган бўларди.

Швейцария озчилик бўлиб қолганига қарамай, ўйиннинг асосий вақтида дуранг ҳисобни ушлаб қолди. Аммо экстра-таймларда Аргентина сон жиҳатдан устунликдан фойдаланди – 112-дақиқада Ҳулиан Алварес чап қанотдан айланма зарбаси билан ғалаба голни урди. Швейцарияликлар сўнгги дақиқаларда тўлиқ куч билан олдинга ўтиб кетганида эса Лаутаро Мартинес якуний ҳисобни ўрнатди. Аргентиналиклар яна бир марта ўз мухлисларини азоблади, аммо барибир яримфиналга йўл олди.

Жуддан мастер-класс

Бу жаҳон чемпионатига ўзгача кайфият бағишлаган Норвегия миллий жамоасини бу турнирда барча ёқтириб қолганди, лекин энди дунё ҳар ўйиндан кейин «эшкак эшиш» маросимини уюштирувчи футболчилар ва мухлисларни кўрмайди. Ўйиндан олдинги аксар прогозларда ҳам Англия скандинавларнинг тарихий сафарига якун ясаши тахмин қилинаётганди – таркиблар даражаси ўртасида фарқ катта эди.

Кучлар нисбатига қарамай, ўйиннинг бошини жамоалар тенг ўтказишди. Бўлим охирида эса норвеглар фаоллаша бошлади ва биринчи бўлиб гол уришди. Бразилия билан ўйинда бурилиш ясаган ва бу турнирда илк бор бошланғич таркибдан ўрин олган 22 ёшли Андреас Шелдеруп яна ўзини кўрсатди: у Эдегордан пас қабул қилиб олиб, ўткир бурчакда турганига қарамай, ажойиб зарба йўллади.

Танаффусгача норвегларда гол уриш учун яна имкониятлар бўлди, аммо ҳужум вакилларида реализация бўйича муаммолар юзага келди. Кейин эса инглизлар нима учун ўйиндан олдин фаворит деб кўрилганини исботлашди – биринчи бўлимга қўшиб берилган дақиқаларда Жуд Беллингҳэм жарима майдони ичида бир неча ҳимоячини ортда қолдириб, ҳисобни тенглаштирди.

«Реал» яримҳимоячиси ушбу турнирни жуда юқори суръатда ўтказмоқда – у гуруҳ босқичида иккита гол урганди, кейин эса 1/8 финалда ўз дубли билан Мексика устидан ғалаба келтирди (3:2). Бу ўйинда ҳам катта саҳнага чиқиб, қўшимча бўлимлар бошида иккинчи голини (турнирдаги олтинчи) уриб, ўйин тақдирини ҳал қилди. Норвегия жавоб қайтара олмади ва турнирдаги иштирокини якунлади.

ЖЧ иштирокчиси вафот этди

ЖАР миллий жамоаси футболчиси, 2026 йилги жаҳон чемпионатида учта ўйин ўтказган Жейден Адамс ўз уйидан жонсиз ҳолда топилди. Бу қайғули воқеа ҳақида дастлаб SoccerLaduma нашри хабар тарқатди. Кейин Жанубий Африка футболчилари касаба уюшмаси бу маълумотни тасдиқади.

Журналист Нуху Адамс ва бошқа қатор манбаларга кўра, 25 ёшли футболчи сўнгги вақтларда депрессиядан азият чеккан ва катта эҳтимол билан, ўз жонига қасд қилган. Адамснинг руҳий ҳолатига турнир вақтида бувиси вафот этгани таъсир кўрсатган бўлиши мумкин.

Ижтимоий тармоқларда ЖАР ЖЧ плей-оффига чиққанидан кейин олинган видео тарқалган: унда кийим алмаштириш хонасида бутун жамоа муваффақиятни байрам қилаётгани, Жейден эса бир четда қайғули алпозда ўтиргани акс этган. Шу билан бирга, оила вакили Брендин Жонсоннинг айтишича, Адамсда руҳий муаммолар бўлмаган.

«Мен у билан пайшанба куни гаплашгандим, у оптимистик кайфиятда эди ва янги мавсумга тайёрланаётганди. У вақтни беҳуда сарфламас, уйда оиласи билан бирга эди. Шунинг учун ҳозир сўз тополмаяпман», – дея унинг сўзларини келтиради SoccerLaduma.

Ҳоланд Перуни забт этмоқда

Жаҳон чемпионатидаги ёрқин иштироки туфайли Эрлинг Ҳоланднинг машҳурлиги янада ортди. Ушбу норвегиялик ҳужумчининг юқори даражадаги спорт формаси айниқса перуликларда катта таассурот қолдирган – у ерда энди янги туғилган чақалоқларга «Манчестер Сити» форвади шарафи исм қўйилмоқда.

Миллий идентификация реестридаги маълумотларга кўра, аллақачон 468 нафар чақалоққа Ҳоланд исми берилган, яна 91 нафари – Эрлинг Ҳоланд деб аталади. Бу болаларнинг аксари ЖЧ-2026 стартидан кейин туғилган. Норвегия Бразилияни енгиб, турнир чоракфиналига чиққанидан кейин бундай исм қўйиш янада кўпайган.

Ҳозирда Перуда 3402 кишининг исми Месси деб аталади, шундан 292 нафарига тўлиқ Лионел Месси деб ном қўйилган. Яна 1185 киши Криштиану Роналду шарафига номланган.

Куртуа чарчади

Белгия миллий жамоаси дарвозабони Тибо Куртуа чоракфиналда Испанияга қарши кечган ўйинни (1:2) жароҳат туфайли охиригача давом эттира олмади, унинг ўрнига туширилган дарвозабон Ламменс йўл қўйган хато эса миллий жамоа турнирни тарк этишига сабаб бўлди. Шундан кейин 34 ёшли футболчи миллий жамоадаги иштирокида танаффус қилиш ниятини маълум қилди.

«Миллий жамоадаги келажагимга келсак – кўрамиз. Мен танаффус қилиб, Миллатлар Лигасини ўтказиб юборишим мумкин, чунки бу энг муҳим турнир эмас», – дея унинг сўзларини келтиради The Athletic.

Бундан ташқари, Куртуа Испания билан ўйин унинг миллий жамоа сафидаги сўнгги ўйини бўлиб қолиши мумкинлигини қўшимча қилган.

«Кейин Европа чемпионати саралаш босқичига қайтарман. Аммо охир-оқибат қарор федерацияда қолади. Агар йўқ бўлса, бугунги ўйин мен учун охиргиси бўлиб қолиши мумкин», – дея хулоса қилади Тибо.

Колумбияча эҳтирослар

Колумбия миллий жамоаси ҳужумчиси Ҳаминтон Кампас 1/8 финалда Швейцарияга қарши ўйинда (0:0, пеналтилар сериясида 3:4) қулай имкониятдан фойдаланмагани туфайли нафратли реакциялар тўлқинига дуч келди. Энди ушбу футболчи ватанига қайтишга чўчимоқда.

«Менинг Колумбиям, илтимос, ўзаро ҳурматни ҳеч қачон унутма. Биз воқеаларга турлича қарашимиз, ҳафсаламиз пир бўлиши ёки хафа бўлишимиз мумкин, аммо ҳеч қандай эҳтирос нафрат ва қўрқувда яшашни оқламайди. Бутун Колумбияга фақат бир нарсани айтишим мумкин: мен ҳам турнирни тарк этганимиздан азоб чекяпман. Биз ҳам курашни давом эттиришни орзу қилгандик», – дея ёзган у ижтимоий тармоқда.

Бу постдан кейин кўпчилик 1994 йилги мундиалдан кейин колумбиялик ҳимоячи Андрес Эскобар билан рўй берган фожиани ёдга олди: ўшанда Колумбия гуруҳ босқичидаёқ иштирокини якунлаган, Эскобар эса АҚШ билан ўйинда (1:2) ўз жамоаси дарвозасини ишғол этиб қўйганди. 1994 йил 2 июлда, ўша ўйиндан бир неча кун ўтиб Эскобарни Меделиндаги кафе олдидаги автотураргоҳда отиб кетишади. Киллер унга қарата олти бор ўқ узган ва ҳар сафар тепкини босганидан кейин «Гол!» дея ҳайқирган.

Инфантино қўлловни йўқотмоқда

АҚШ миллий жамоаси форварди Фалорин Балогуннинг дисквалификацияси Доналд Трампнинг қўнғироғидан кейин бир йил муддатга кечиктирилиши билан боғлиқ кейс ФИФА президенти Жанни Инфантинонинг нуфузига таъсир кўрсатишда давом этмоқда.

The Times маълумотига кўра, бунгача ушбу швейцариялик мулозим лавозимига қайта сайланиши тарафдори бўлган мамлакатлардан бир қанчаси энди позициясини ўзгартириши мумкин. Шунга қарамай, у кейинги сайловда ҳам ғалаба қозониши эҳтимоли юқорилигича қолмоқда.

«Инфантинонинг таъсир доираси қисқармоқда, ҳозир у яккаланиб қолган – у реал ҳокимиятни йўқотган президент бўлади», – дея футбол доираларидаги юқори мартабали манбанинг сўзларини келтиради нашр.

Катта эҳтимол билан, у энди клублар ўртасидаги жаҳон чемпионати форматини кенгайтиришга ёки турнирни ҳар икки йилда бир марта ўтказиш режасини амалга оширишга эриша олмайди. Шунингдек, 2031 йилда охирги муддати тугагандан сўнг унга яна ўз номзодини қўйишга имкон берадиган ФИФА низомига ўзгартириш киритилиши деярли истисно қилинган.