Африка етакчилари ташрифи вақтидаги зарба ва озод этилган қишлоқ манзаралари. Уруш суратлари

Украинадаги урушнинг 478-куни ўтди. Асосий маълумотлар: 

• Владимир Путин Петербург халқаро иқтисодий форумида Володимир Зеленскийни «яҳудий халқи учун шармандалик» деб атади. Россия президенти йиғилганларга холокост ҳақида кино қўйиб берди ва уни гўёки Киевдагилар инкор этишини айтди.
• Журналистларнинг аниқлашича, Россиянинг 2023 йил бошида Бахмут ва Вуҳледардаги йўқотишлари урушнинг дастлабки ҳафтасидагидан юқорироқ бўлган.
• Киевда Африка мамлакатлари етакчилари Зеленский билан тинчлик ташаббусини муҳокама қилиш учун учрашди. Музокаралар якунларига кўра Зеленский Украинага «чинакам тинчлик кераклиги — бу эса Россия қўшинлари олиб чиқилишини талаб этиши»ни айтди. Учрашув куни Россия қўшини Киев ва Украинанинг бошқа шаҳарларини ўққа тутди.
• Путин Россия қўшини Киев атрофида америкаликларнинг Patriot ҳаво ҳужумидан мудофаа комплексларини йўқ қилганини айтди. У айнан нимани назарда тутгани аниқ эмас: Украина расман иккита комплекс қабул қилиб олган, уларнинг ҳар бири олтитадан учириш қурилмасига эга.
• Путин шунингдек Беларусга ядро зарядларининг биринчи партияси етказиб берилганини маълум қилди.
• Британия разведкаси Украинада катта эҳтимол билан россиялик генерал-майор Сергей Горячев ҳалок бўлганини хабар қилди.
• Зеленский фронтдаги вазиятни «умуман олганда позитив, аммо мураккаб» деб атади.
• Белгород области губернатори Вячеслав Гладков Шебекинода отишмалар оқибатида жами 113 та кўп қаватли ва 700 та хусусий уйлар шикастлангани ҳақида айтди.

Озод этилган Блаҳодатне қишлоғи

Донецк области ғарбидаги Блаҳодатне қишлоғи Украина қуролли кучларининг қарши ҳужуми давомида озод этилди, бу ҳақда 10 июн куни украин ҳарбийлари хабар беришганди. У Мокрие Яли дарёси водийсида, «Времевка бўртиғи» этагида жойлашган — РФ мудофаа вазирлиги россияликларнинг Донецк ва Запорижжя областлари туташган ҳудудда, Великая Новосилка райони марказига қараб йўналган позицияларини Времевка посёлкаси асосида шундай атаган. Украин ҳарбийлари маҳаллий Маданият уйида ўрнашган россиялик ҳарбийлар томонидан қаттиқ қаршилик кўрсатилгани ҳақида хабар берган. РФ мудофаа вазирлигига алоқадор «Рыбарь» телеграм-канали эса Украина қуролли кучлари Блаҳодатнени «амалда жангсиз эгаллагани» (гўёки «ДХР» кучлари қуршовга тушиб қолмаслик учун, кейинги позицияга чекинган) ҳақида ёзган. Россия оккупацияси вақтида, украинларнинг маълумотларига кўра, қишлоқдаги қурилмаларнинг 80 фоизи вайрон бўлган. 

Херсон ўққа тутилиши

16 июн куни — Украинага Африка давлатлари етакчилари ташриф буюрган маҳалда — Россия қўшини Херсон бўйлаб ёппасига зарба йўллади. Тинч аҳоли вакиллари бўлган 25 киши, жумладан уч нафар бола жароҳатланган, икки киши ҳалок бўлган.

Украина президенти офиси раҳбари Андрей Ермакка кўра, Херсон маркази, Корабел райони ва Тавр микрорайони (шаҳардаги энг йирик микрорайон) зарбага учраган. Тиббиёт муассасаси, болалар боғчаси, супермаркет, кўп квартирали турар жой бинолари, автомобиллар, электр узатиш линиялари шикастланган.

Киев Африка етакчилари ташрифи вақтида ўққа тутилди

16 июн куни Киевга Украина ва Россия можаросини ҳал қилиш бўйича ўз режасини таклиф этган Африка давлатлари етакчилари ташриф буюрди (бу режа тезроқ музокаралар бошлаш ҳамда икки томонга ҳам хавфсизлик кафолати тақдим этишни назарда тутади). Шу соатларда, Украина қуролли кучлари ҳаво қўшинлари маълумотига кўра, Киев шаҳри ва Киев области бўйлаб россияликларнинг баллистик ракеталари учирилган; бутун Украина бўйлаб ҳаво тревогаси эълон қилинган. Reuters журналистлари африкалик сиёсатчилар бомбапанагоҳ сифатида фойдаланиш учун меҳмонхонага чопаётганини кўришгани ҳақида хабар беришган. «Россияликларнинг ракеталари — бу Африкага сигнал: Россия тинчликни эмас, катта урушни истамоқда», — дея ёзди Украина ташқи ишлар вазири Дмитро Кулеба твиттер саҳифасида. 

Украинанинг турли ҳудудларидан суратлар

Никополдаги бомбапанагоҳ