Ёшлар агентлиги ўз ҳомийлигидаги лойиҳа ижрочиларини тендер ғолиби деб топди

Баёнотда айтилишича, танловда ғолиб бўлган “Language Media” МЧЖ ва унинг раҳбари Санжар Мухиддиновнинг “агентликка алоқаси йўқ” ва у “ташкилотда фаолият олиб борувчи масъулларнинг қариндоши ҳисобланмайди”.

“Санжар Муҳиддиновнинг лойиҳа доирасидаги видеоларда кўриниш бергани унинг танловдаги иштирокида ҳеч қандай устунлик бермаганини алоҳида таъкидлаймиз”, – дея қайд этган Ёшлар ишлари агентлиги.

Очиқ маълумотларга кўра, Санжар Муҳиддинов Тошкентдаги Сингапур менежментни ривожлантириш институти талабаси ҳисобланади. У 2023 йилнинг феврал ойидан бошлаб Ёшлар ишлари агентлиги ҳомийлигидаги “Ибрат фарзандлари” лойиҳаси раҳбари ўринбосари лавозимида ишлайди ва у очган 3 ойлик МЧЖ ўзи ҳамкорликда ишлайдиган ташкилотнинг тендерида ютиб чиққан.

“Language-Media” МЧЖнинг юридик манзили сифатида Тошкент шаҳри Юнусобод тумани 15-мавзе 40-уй 4-хонадон кўрсатилган. Kun.uz'нинг эътибор қаратишича, бу ерда ҳеч қандай корхона фаолият юритмайди – бу манзил аҳоли яшайдиган кўп қаватли уйлардан биридаги хонадоннинг манзили. Бу эса ғолиб компаниянинг видеолар съёмка-монтажи билан қаерда шуғулланиши ва умуман қай даражада бунга салоҳиятли экани ҳақидаги саволни келтириб чиқаради.

Шартномага асосан, маблағнинг 1 млрд 380 миллион сўми испан ва инглиз тилларидан 200 та видеодарс тайёрлаш учун (ҳар бир видеодарс 6,9 млн сўмга баҳоланган), қолган 150 млн сўми эса 3та ҳудудда хорижий тиллар марафонини ўтказиш учун ажратилади.

Агентлик маълумотига кўра, видеолар съёмкаси агентлик ажратган ҳудудда ва Саноатқурилишбанк ҳомийлигида ажратилган павильонда олинади. Съёмка қилиш учун жойни давлатнинг ўзи таъминлаб берса, яъни хусусий ташкилот видеоларни суратга олиш учун павильон қуриш ё ижарага олишга харажат қилмаса, 1 та видео учун 6,9 млн сўм ажратилиши бугунги бозор нархига қанчалик мос келади?

Давлат буюртмасини бажараётган хусусий компания видеоларни ўзига тегишли камера, микрофон ва чироқлар ёрдамида съёмка қилиб, ўзига тегишли компютерларда монтаж қиляптими ёки зарур техникаларни ҳам давлат ташкилоти тақдим этяптими – бу маълум эмас. Шу ўринда, компаниянинг устав капитали бор-йўғи 1 млн сўм эканини эслатиб ўтиш зарур, видео тайёрлашда керак бўладиган замонавий техникалар эса арзон турмайди.

Kun.uz мухбири видеороликлар олишга ихтисослашган таниқли фирмалардан бири билан мижоз сифатида боғланиб, “Ибрат фарзандлари” лойиҳасидаги видеоларни кўрсатган ҳолда, бундай видеоларни қанча ҳақ эвазига тайёрлаб беришлари билан қизиқди. Компания расмий тижорий таклиф йўллаган ҳолда, бундай турдаги (10-15 дақиқали, мураккаб элементларсиз, ўқитувчидан ташқари асосан статик матн ва суратлардан иборат, нисбатан содда монтаж қилинган) 10 та видеони 23 млн сўмга тасвирга олиш ва монтаж қилиб беришга тайёрлигини билдирди. Бунда битта видео учун 2 млн 300 минг сўм нарх тўғри келади. Давлат эса, юқорида айтилганидек, 6 млн 900 минг сўмдан тўламоқда.

Биз боғланган компания таклиф этган нарх ичига ўқитувчи хизмати киритилмаган. Kun.uz мухбири ўқитувчиларга видеодарслар учун тўланадиган ҳақ миқдори ҳақида маълумот олиш учун “Ибрат фарзандлари” лойиҳаси раҳбари Рустам Қориев билан боғланди. Унинг сўзларига кўра, видеодарслар учун ўқитувчиларга уларнинг маҳорати ва педагогик тажрибасига қараб 500-1000 доллар атрофида ҳақ тўланади.

“Биз ойлик бермаймиз. Ўқитувчига битта тилдан дарс ўтиш учун маълум юклама қўйилади. Масалан, ўртача дарсимизнинг сони 100та бўладиган бўлса, ўқитувчи уни 1, 2 ёки 3 ойда ҳам тугатиб қўйиши мумкин. Қанчалик тез ва қанчалик сифатли қилиб берса, шунга қараб бераверамиз”, – деди Қориев.

У ўқитувчилар билан битта видеодарс учун қанча нархда ҳисоб-китоб қилинаётганига аниқлик киритмади. Агар унинг сўзларидан келиб чиқиб 100 та видеодарс учун 1000 доллар тўланади дея тахмин қилсак, битта видеодарс учун эҳтимолий 10 долларлик нарх келиб чиқади. Бу эса давлат томонидан битта видеодарс учун тўланаётган 6,9 млн сўмнинг ичида ўқитувчининг хизмат ҳақи катта ўрин тутмаслигига ишора қилади.