Байден Си Жинпингни диктатор деб атади, Пекин буни «очиқ провокация» деди

Жо Байден 2023 йил бошида Хитой ҳаво шари АҚШ узра уриб туширилганидан кейин, Си Жинпингнинг бунга муносабати ҳақида гапирар экан, уни диктатор деб атади. 

Байден Калифорниядаги сайловолди тадбирида Си ҳаво шари билан боғлиқ можародан жуда норози бўлганини айтди. 

«Мен икки вагон жосуслик аппаратураси ўрнатилган ўша шарни уриб туширганимда Си жуда норози бўлди. Чунки бу шар ҳақида хабари йўқ экан. Бу диктаторлар нима бўлаётганини билмасликни ёқтирмайди», деди Байден. 

АҚШ Давлат котиби Энтони Блинкен 18-19 июнь кунлари Пекинга ташриф буюрди. Унинг ташрифидан мақсад Хитой ва Қўшма Штатлар ўртасидаги сўнгги ойларда сезиларли даражада кучайган кескинликни юмшатиш эди. 

Блинкен душанба куни Си Жинпинг билан учрашди. Си учрашувда бироз олдинга силжиш бўлганини маълум қилди, Блинкен ҳар икки томон музокараларни давом эттиришга тайёр эканига ишора қилди. Шу билан бирга, Давлат котиби Пекин ва Вашингтон ўртасида жиддий келишмовчилик сақланиб қолаётганини таъкидлади. 

Бу келишмовчиликлар савдо сиёсати, Хитой куч ишлатиб босиб олиш билан таҳдид қилаётган Тайван тақдири ва Хитойдаги инсон ҳуқуқлари билан боғлиқ вазиятга тегишли. 

Бу АҚШ ташқи сиёсати раҳбарининг сўнгги беш йил ичида Хитойга биринчи ташрифи бўлди. 

Хитой Ташқи ишлар вазирлиги Жо Байден сўзларини «ўта бемаънилик ва масъулиятсизлик» деб атади. «Бу очиқ сиёсий провокация», деди Хитой Ташқи ишлар вазирлиги матбуот котиби Мао Нинг. 

Унинг таъкидлашича, Байденнинг «диктатура» ҳақидаги изоҳлари «фактлар, дипломатик протокол ва Хитойнинг сиёсий қадр-қимматини жиддий равишда бузади».  

«Хитой бундан жуда норози ва қатъиян қарши», деди Мао Нинг.