АҚШ NIS учун вақтинчалик лицензия муддатини яна 30 кунга узайтирди

АҚШ Молия вазирлиги ҳузуридаги Хорижий активларни назорат қилиш бошқармаси (OFAC) Сербиянинг NIS нефт компаниясига санкциялар шароитида фаолият юритиш имконини берувчи вақтинчалик лицензия муддатини яна 30 кунга узайтирди. Бу қарор компания фаолиятини узлуксиз давом эттириш ҳамда «Газпром» улушини сотиш жараёнини якунлаш учун қўшимча вақт беради.

Фото: AP

Сербия энергетика вазири Дубравка Джедович-Ханданович маълум қилишича, OFAC NIS компанияси учун берилган вақтинчалик лицензияни яна бир ойга узайтирган. Шу тариқа компания АҚШ санкциялари амал қилаётган шароитда ҳам ўз операцион фаолиятини давом эттира олади.

Вазирнинг айтишича, Панчево шаҳридаги нефтни қайта ишлаш заводи хом нефтни қайта ишлашни тўхтатмаган ва ишлаб чиқариш жараёни давом этмоқда.

NIS 2025 йил январ ойида компания капиталида «Газпром» иштирок этгани сабабли АҚШнинг санкциялар рўйхатига киритилган эди. Вашингтон «Газпром нефть» ҳамда у билан боғлиқ компанияларга тегишли умумий 56 фоиз акциялар сотилишини талаб қилмоқда. Санкциялар кучга киргач, Хорватия орқали ўтувчи Адриатика нефт қувури (JANAF) бўйлаб нефт етказиб бериш тўхтатилган, натижада Панчеводаги нефтни қайта ишлаш заводи ҳам ишини вақтинча тўхтатишга мажбур бўлган.

Аввалроқ Венгриянинг энг йирик нефт-газ компанияси — MOL «Газпром» ва «Газпром нефть»га тегишли улушларни сотиб олиш бўйича келишув имзолаган эди. OFAC дастлаб ушбу битимни 2026 йил 22 майга қадар якунлаш муддатини белгилаган, аммо кейинчалик бу муддатни бир неча марта узайтирди.

Айни пайтда «Газпром нефть» NIS акцияларининг 44,9 фоизига эгалик қилади. Яна 11,3 фоиз акция «Газпром»нинг инвестиция бўлинмаси тасарруфида. Сербия ҳукумати эса компаниянинг 29,9 фоиз акцияларига эга.

NIS Сербия энергетика тизими учун стратегик аҳамиятга эга компания ҳисобланади. У мамлакатнинг бензин ва дизел ёнилғисига бўлган эҳтиёжининг қарийб 80 фоизини, авиация ёнилғиси ва оғир мазутга бўлган талабнинг эса 90 фоиздан ортиқ қисмини таъминлайди.