Фронт яқинида таъмирланаётган Leopard ва Донбасс шимолидаги жанглар. Уруш суратлари

Украинада урушнинг 483-куни ўтди. Асосий маълумотлар:

РФ Конституциявий суди армияни «обрўсизлантириш» тўғрисидаги моддани Конституцияга зид эмас деб топди ва уни бекор қилмади.
ЕИ мамлакатлари махсус вакиллари Россияга қарши санкцияларнинг 11-пакети бўйича келишиб олди. У аввалроқ киритилган санкцияларни айланиб ўтишга қарши қаратилган.
Зеленский қарши ҳужум «исталганидан кўра секинроқ» кетаётгани, аммо бу «ҳолливудча филм эмаслиги»ни айтди.
Иккита дрон Москва областидаги ҳарбий қисм омборлари яқинида қулади. Яна бир дрон қолдиқлари Новая Москва ҳудудида топилган.
РФ Тергов қўмитаси урушга қарши фаоллардан бири Анатолий Березиковнинг махсус ҳибсхонадаги ўлимидан сўнг ўз жонига қасд қилишгача олиб борганлик моддаси бўйича жиноий иш қўзғади.

Запорижжя областида Leopard 2 танклари

2023 йил бошида Ғарбнинг қатор давлатлари, жумладан АҚШ, Полша, Германия ва Буюк Британия Украина қуролли кучларига танклар етказиб беришга розилик билдирди. Баҳорда ушбу давлатлар Украинага дастлабки Leopard 2 танкларини юборишди.

Июн ойи ўрталарида РФ мудофаа вазирлиги камида еттита Leopard танки йўқ қилингани ҳақида маълумот берди. Oryx ҳарбий-таҳлилий лойиҳаси Украина қуролли кучлари немислар томонидан ишлаб чиқарилган танклардан саккизтасини йўқотганини тасдиқлаган — шундан фақат иккитаси йўқ қилинган (қолгани ёки шикастланган, ёки жанг майдонида қолдирилган). Қуйида украин ҳарбийлари фронт чизиғи яқинида Leopard 2 танкини таъмирлаётгани акс этган суратлар.