Маск ва Цукерберг рингда жанг ўтказади, улар йиллар давомида жанжаллашиб келмоқда 

Twitter эгаси Илон Маск Facebook ва Instagram хўжайини Марк Цукерберг билан рингда жанг қилишга тайёрлигини айтди. У рақибни жанг қилиш учун жой танлашга таклиф қилиб, чақирувни қабул қилди. Миллиардерлар бир неча йиллардан буён жанжаллашиб келмоқда. 

The Insider хабарига кўра, ҳаммаси Twitter фойдаланувчиларидан бирининг хабаридан кейин бошланди. У Цукербергга тегишли Meta компанияси янги ижтимоий тармоқ – Twitter рақобатчисини ишга тушириш режаcи ҳақида ёзди. Маск бунга истеҳзо билан изоҳ қолдирди. 

«Ишончим комилки, Ер курраси Цукербергнинг оёғи остига тушиб қолишни интиқлик билан кутмоқда, бундан бошқа иложи йўқ», деб ёзди Маск. 

Фойдаланувчилардан бири бунга шундай жавоб берди: «Эҳтиёт бўлинг, мен у [Цукерберг] ҳозир жиу-житсу билан шуғулланаётганини эшитдим». 

Маск бунга жавобан: «Агар у тайёр бўлса, мен рингдаги жангга тайёрман», деб ёзди. 

Цукерберг бу чақирувга Instagram ижтимоий тармоғида жавоб қайтарди: «Қаерда жанг қилиш кераклигини ёзиб юбор». 

Маск Лас-Вегасдаги UFC чемпионати ўйинлари ўтказиладиган Vegas Octagon аренасини таклиф қилди. 

Марк Цукерберг 39 ёшда, у жанг санъати билан жиддий шуғулланади, хусусан, май ойида жиу-житсу турнирида иккита медални қўлга киритди. 

Илон Маск июнь ойи охирида 52 ёшга тўлади. Ўзининг сўзларига кўра, унинг спорт машғулотлари асосан болаларини даст кўтариб, осмонга отиш билан чекланади. Маск, шунингдек, ўзининг севимли ҳаракати «морж» деб аталишини айтди: «Мен шунчаки рақибимнинг устига ётиб олиб, ҳеч нарса қилмайман». 

Маск ва Цукерберг 2016 йилдан бери бир-бирини очиқ танқид қилиб келмоқда. Шу вақтда Цукерберг SpaceX ракетасининг портлаши Facebook компаниясига тегишли сунъий йўлдошни йўқ қилганидан ғазабланган эди. Маск SpaceX асосчиси ҳисобланади. 

Орадан бир йил ўтиб Цукерберг Маскнинг сунъий интеллект ривожланиши билан боғлиқ хавфлар ҳақида огоҳлантирувчи баёнотларини «масъулиятсизлик» деб атади. Маскнинг таъкидлашича, Цукерберг муҳокама қилинаётган мавзуни «тор доирада» тушунади холос. 

2017 йилда Маск SpaceX ва Tesla компаниялари саҳифаларини Facebook тармоғидан ўчириб ташлади. 2020 йилда эса Цукербергнинг қўлида ҳаддан ташқари кўп куч тўплангани ҳақидаги тезисга қўшилиб, барчани ушбу ижтимоий тармоқдаги аккаунтларни ўчириб юборишга чақирди. 

2021 йилда Маск Facebook тармоғини фойдаланувчилар устидан жосуслик қилишда айблади. 

2023 йил апрель ойида Fox телеканали бошловчиси Карлсон Такерга берган интервьюсида Маск Цукербергни АҚШ аҳолисини сайловларда овоз беришга ундашга қаратилган «Боринг ва овоз беринг» кампаниясига 400 миллион доллар сарфлагани учун танқид қилди. Маскнинг фикрича, бу кампания Демократик партияни хуфёна молиялаштириш учун ташкил этилган. Маскнинг ўзи Республикачилар партияси тарафдори ҳисобланади. 

Маск, шунингдек, The Wall Street Journal томонидан ўтказилган суриштирувга ҳам эътибор қаратди. Мақолада айтилишича, Instagram педофиллар учун контент тарқатмоқда, унда бу иш билан шуғулланувчи аккаунтлар бор. «Бу жуда ташвишли», деб изоҳ берди Маск.