Францияда полициячи томонидан ўлдирилган ўсмир иши бўйича янги тартибсизликлар юз берди

Париж ва унинг чеккасида, шунингдек, Франциянинг бошқа шаҳарларида 29 июнь, пайшанбага ўтар кечаси полициячи йўл текшируви вақтида 17 ёшли ҳайдовчини отиб ўлдирганидан кейин бир неча кун аввал бошланган тартибсизликлар давом этди. Эрталабгача 35 киши қўлга олинди. 

Фожиа 27 июнь куни юз берган. Полиция маълумотларига кўра, машинани бошқараётган Наэл М. исмли йигит унинг талабларини бажаришдан бош тортган. Франциянинг Rfi интернет нашри хабарига кўра, ёш ҳайдовчини отган 38 ёшли полициячи қасддан қотилликда гумон қилиниб, ҳибсга олинган. 

27 июнь куни ижтимоий тармоқларда воқеа акс этган видео тарқалди. Ундан кўриниб турибдики, сариқ рангли машинани текшириш вақтида полициячилардан бири ҳайдовчига қурол ўқталиб турган. Машина узоқлашаётганда полициячи ўқ узган ва ҳайдовчининг кўкрагини нишонга олган. Воқеа жойига етиб келган шифокорлар Наэлни қутқара олмади. Маълумотларга кўра, у билан бирга машинада яна икки киши бўлган. Улардан бири қочишга муваффақ бўлган, иккинчиси - вояга етмаган шахс, қўлга олинган, аммо 29 июнь куни эрта тонгда қўйиб юборилган. 

Нантер ва Парижнинг бошқа бир қанча чекка ҳудудларида тартибсизликлар 27 июнь куни кечқурун бошланган. Эрталаб Нантер мэрияси баёнот чиқариб, тинчланишга чақирди ва «Наэл учун адолат»ни талаб қилди. 28 июнь, чоршанба куни кечқурун вазият яна кескинлашди, деб ёзади AFP агентлиги. Мухбирларга кўра, тартибсизликлар вақтида ўндан ортиқ машина ва кўплаб чиқинди контейнерларига ўт қўйилган, шунингдек, кўчалар тўсилган. Одамлар полицияга тош отишни бошлаганида, улар кўздан ёш оқизувчи газ ишлатган. 

Аввалроқ, тартибсизликларнинг биринчи кечасида, полиция префекти Лоран Нунесга кўра, 42 та машина ёқиб юборилган. Ўшанда 24 полициячи жабрланган, 24 киши қўлга олинган.