Францияда тартибсизликлар туфайли оммавий тадбирлар бекор қилинди

Франция ҳукумати кетма-кет уч кеча давом этган кўча тартибсизликлари фонида барча оммавий тадбирларни бекор қилишга ва бутун мамлакат бўйлаб 21:00 дан бошлаб ерусти жамоат транспорти фаолиятини тўхтатишга қарор қилди. Бу ҳақда 30 июнь, жума куни кечқурун Франциянинг AFP ахборот агентлиги хабар берди. 

Бундан ташқари, полициячи 17 ёшли автомашина ҳайдовчиси Наэл М.ни отиб ўлдирганидан кейин 27 июнь оқшомида бошланган тартибсизликларга қарши курашда жандармерия зирҳли техника ва воситалари қўлланилади. Бу ҳақда Франция бош вазири Элизабет Борн маълум қилди. 

Ўз навбатида, мамлакат Ички ишлар вазирлиги раҳбари Жералд Дарманен 30 июнь куни кечқурун TF1 телеканали эфирида чиқиш қилиб, 1 июлга ўтар кечаси кўчаларда тартибни таъминлаш мақсадида 45 минг полициячи жалб этилишини айтди. Таққослаш учун: 29 июндан 30 июнга ўтар кечаси шу мақсадда 40 минг полициячи жалб қилинган эди. 

Ўсмир билан боғлиқ фожиа 27 июнь куни юз берган. Полиция маълумотларига кўра, машинани бошқараётган Наэл М. исмли йигит унинг талабларини бажаришдан бош тортган. Франциянинг Rfi интернет нашри хабарига кўра, ёш ҳайдовчини отган 38 ёшли полициячи қасддан қотилликда гумон қилиниб, ҳибсга олинган. 

27 июнь куни ижтимоий тармоқларда воқеа акс этган видео тарқалди. Ундан кўриниб турибдики, сариқ рангли машинани текшириш вақтида полициячилардан бири ҳайдовчига қурол ўқталиб турган. Машина узоқлашаётганда полициячи ўқ узган ва ҳайдовчининг кўкрагини нишонга олган. Воқеа жойига етиб келган шифокорлар Наэлни қутқара олмади. Маълумотларга кўра, у билан бирга машинада яна икки киши бўлган. Улардан бири қочишга муваффақ бўлган, иккинчиси - вояга етмаган шахс, қўлга олинган, аммо 29 июнь куни эрта тонгда қўйиб юборилган.