Францияда оммавий тартибсизликлар тугагани эълон қилинди 

Франция Ички ишлар вазирлиги раҳбари Жералд Дарманен оммавий тартибсизликлар тугаганини маълум қилди. Унинг сўзларидан Франция Сенати матбуот хизмати иқтибос келтирмоқда. 

«Биз бутун Франция бўйлаб осойишталик қайтганини тасдиқлаймиз», деди вазир. 

Шу билан бирга, Дарманен ҳуқуқ-тартибот идоралари ҳамон сафарбарликни кучайтириш режимида эканини айтди. 

Бунгача Франция бош вазири Элизабет Борн ҳам мамлакат бўйлаб бошланган тартибсизликлар билан боғлиқ вазият деярли бутунлай нормал ҳолатга қайтганини маълум қилди. 

Аммо бир кун аввал Франция президенти Эммануэл Макрон республикада кенг кўламли тартибсизликлар авжига чиққанини айтган эди. 

Францияда норозилик намойишлари 27 июнь куни кечқурун Париж чеккасида 17 ёшли ўсмирнинг полиция қўлида ўлгани ортидан бошланган эди. 29 июнга ўтар кечаси намойишчилар машиналарга ўт қўйди, дўкон ойналарини синдирди, полициячиларга ҳужум қилди ва баррикадалар қурди.