Евродепутат: Украинанинг ЕИга аъзолиги бўйича музокаралар 3-4 йилни талаб қилади

Киев ва Брюссел Украинанинг Европа Иттифоқига қўшилиши бўйича музокараларни 2027 йилда якунлашга интилиши керак, деди 5 июль, чоршанба куни Европарламент депутати Андрюс Кубилюс. «Бизнингча, бу музокаралар қандай кечишини аниқ ифодалаш керак. Ғарбий Болқон услуби бошқа, Марказий Европа ва Болтиқбўйи мамлакатлари услуби бошқа», - деди у Брюсселдаги Украина-Европа Иттифоқи ассоциацияси қўмитаси йиғилишида. 

Кубилюс Европарламентда вакили бўлган Литванинг Европа Иттифоқига қўшилиши бўйича музокаралар уч йил (худди шу нарса Латвия ва Эстонияга ҳам тегишли), Полшада эса тўрт йил давом этганини эслатди. 

Шу билан бирга, Албания 2013 йилда, Сербия 2012 йилда, Черногория 2010 йилда, Шимолий Македония 2005 йилда Европа Иттифоқига кириш учун номзод мақомини олди. Аммо бу давлатларнинг ҳеч бири ҳали Европа Иттифоқига қўшилмаган. Босния ва Ҳерцеговина 2008 йилда Европа Иттифоқи билан ассоциация шартномасини имзолаган ва унга фақат 2022 йилда номзод мақоми берилган. 

Музокаралар тезлиги «нафақат Украина ислоҳотларда қанчалик олдинга силжишига, балки унинг институтларига ҳам боғлиқ бўлади», деди Европарламент депутати. «Биз уч-тўрт йил ичида музокаралар олиб боришга интилишимиз керак. Бу йил бошласак яхши бўларди ва 2027 йилда Литва ЕИ кенгашига раислик қилса, буни тугатиш мумкин бўлади. Бу бизнинг режамиз», - деди Кубилюс келажакни башорат қилишнинг иложи йўқлигини тан олиб. «Аммо ҳозир бундай амбициялар зудлик билан зарур. Чунки Европа Иттифоқига кириш бўйича музокаралар Украинани қайта қуриш билан параллель равишда олиб борилади ва у ерга сармоя киритиш учун келганлар билиши керакки, ЕИ ва Украина бу улкан режа учун тайёр».

Қўмита ҳамраиси, Олий рада депутати Вадим Галайчук Кубилюсга музокаралар режалари бўйича вақт оралиғини белгилаш чақириғи учун миннатдорчилик билдирди.