Украина Қрим кўпригининг портлатилишига алоқадорлигини тан олди

Украина мудофаа вазири ўринбосари Анна Маляр 2022 йил октябр ойида Қрим кўпригига қилинган ҳужумни Украина Қуролли кучларининг муваффақиятли амалиётлари қаторида қайд этди. Бу ҳақда унинг 8 июль, шанба куни оммага эълон қилинган Telegram’даги хабарида айтилган.

Украина урушининг асосий воқеаларини санаб ўтиб, у ўз постида, хусусан шундай ёзди: «500 кунлик кенг кўламли уруш! Биз Киев вилояти ва Шимолий Украинани озод қилганимизга 462 кун (...) «Москва» крейсерини чўктириб юборганимизга 451 кун бўлди. 273 кун олдин россияликларнинг логистикасини бузиш учун Қрим кўпригига биринчи зарба берилган». 

2022 йил 8 октябр куни эрталаб соат 6 да юк машинаси Таман яримороли томондан Қрим кўпригининг автомобиль қисмида портлаб кетди. Айни вақтда, Краснодар ўлкаси томон ҳаракатланаётган кўприкнинг темирйўл қисмида бўлган поездда еттита ёнилғи баки ёниб кетган. Кўприкнинг иккита автомобиль қисми қулаб тушди, натижада тўрт киши ҳалок бўлди. Россияда ҳодиса натижасида теракт бўйича иш қўзғатилган. 

Украина расмийлари ҳозиргача Қрим кўпригидаги портлашга алоқадорлигини рад этиб келган. Шу тариқа, Украина президенти Володимир Зеленский воқеа Россия ҳарбийлари ва махсус хизматлари ўртасидаги можаро оқибати бўлганини айтганди. «Мен билишимча, биз бунга аниқ буюртма бермаганмиз», деди Украина давлат раҳбари 2022 йил октябрь ойида Канаданинг CTV телеканали журналистлари билан суҳбатда. 

Шу билан бирга, Украина Хавфсизлик хизмати («СБУ») раҳбари Василий Малюк май ойида берган интервьюсида амалдаги қонунчилик ва уруш одатлари Украинага Қрим кўпригига зарба беришга имкон беришини таъкидлади. «Бу логистика маршрути бўлганини ҳисобга олиб, биз душманнинг йўлини тўсишимиз шарт эди, маълум чора-тадбирлар амалга оширилди», деди у.