«Туркия учун ғарб лагерида бўлиш ниҳоятда муҳим», деди Туркия президенти маъмуриятининг коммуникациялар бўлими раҳбари Фаҳреттин Алтуннинг Middle East Eye журналидаги мақоласида.
Туркия НАТО географик кенгайишини «аниқ бир давлатга қарши эмас», балки иттифоқ барқарорликка эришишга ҳисса қўшадиган кенг қамровли хавфсизлик ташкилотига айланиши учун қўллаб-қувватлаяпти. Бу ҳақда Туркия президенти маъмуриятининг коммуникациялар бўлими бошлиғи Фаҳреттин Алтуннинг 15 июль куни Middle East Eye интернет журналида чоп этилган мақоласида айтилган.
Украинанинг Шимолий Атлантика иттифоқига аъзо бўлиш эҳтимоли ҳақида гапирган Алтун, Туркия бу ғояни аниқ қўллаб-қувватлашини таъкидлади. Бу ҳақда Туркия президенти Ражаб Тоййиб Эрдўған НАТОнинг Вилнюсдаги саммити олдидан яна бир бор гапирди, деб эслатади муаллиф.
Швеция ва Финландиянинг НАТОга аъзолиги мавзусини шарҳлар экан, Алтун шундай деди: «Финландия ва Швеция каби номзод давлатлар ҳақида танқидий саволлар кўтарган Туркияни ноҳақ танқид қилганлар, кенгайиш миллий хавфсизлигимиз эвазига амалга оширилмаслигини ҳисобга олишлари керак. Бу НАТОнинг бутун мавжудлигига қарши бўлади».
«Туркия 1952 йилда НАТОга қўшилганидан бери ғарбнинг ажралмас иттифоқчиси бўлиб, трансатлантик ва Европа хавфсизлигини таъминлашда ҳал қилувчи рол ўйнайди», деб таъкидлайди муаллиф. «Туркия олдинга силжишда давом этиб, иттифоқнинг янги ташаббусларида ишончли иттифоқчи ва танқидий ҳамкор бўлиб қолади», - дея қўшимча қилди у мақола якунида.
Шарқ ва Ғарб ўртасидаги географик қуруқлик кўприги ва Қора денгизга олиб борадиган сув йўлларини назорат қилувчи Туркия учун «ғарбий лагерда бўлиш жуда муҳим», дейди Фаҳреттин Алтун. «Туркиянинг НАТОга узоқ ва чуқур содиқлиги Европа хавфсизлигини таъминлади. Унинг давомий фаолияти қитъа хавфсизлиги учун жуда муҳим», - дея хулоса қилди у.
