Шавкат Мирзиёев Саудия Арабистонига боради

Бу Шавкат Мирзиёевнинг президентлик сайловидан кейинги илк хорижий сафари бўлади.

Фото: Президент матбуот хизмати

Икки муқаддас масжид ходими – Саудия Арабистони подшоҳи Салмон бин Абдулазиз Ол Сауднинг таклифига биноан Шавкат Мирзиёев “Марказий Осиё-Кўрфаз араб мамлакатлари ҳамкорлик кенгаши” форматидаги биринчи саммитда иштирок этиш учун 18—19 июль кунлари Жидда шаҳрида бўлади.

Бўлажак олий даражадаги учрашувда Саудия Арабистони Подшоҳлиги, Баҳрайн Подшоҳлиги, Қатар давлати, Кувайт давлати, Бирлашган Араб Амирликлари, Ўммон Султонлиги, Қозоғистон, Қирғиз, Тожикистон ва Туркманистон раҳбарлари ҳамда кенгашнинг бош котиби иштирок этиши кўзда тутилган.

Кун тартибига мувофиқ, сиёсий, савдо-иқтисодий, инвестициявий ва маданий-гуманитар соҳаларда минтақалараро ҳамкорликни ривожлантириш масалалари кўриб чиқилади. Халқаро ва минтақавий сиёсатнинг долзарб жиҳатлари юзасидан фикр алмашилади.

Саммит доирасида икки томонлама қатор учрашувлар ўтказилиши режалаштирилган.