Мунтазам авиапарвозлар 20 июлдан бошланади.
Uzbekistan Airways компанияси 20 июлдан бошлаб Тошкент–Самарқанд–Тошкент йўналиши бўйича ҳар куни L-410 самолётида мунтазам авиақатновларни йўлга қўяди.
HY1001 рейси Тошкентдан соат 8:30 да учади ва Самарқандга соат 9:55 да қўнади.
HY1002 рейси Самарқанддан соат 10:55 да учади ва Тошкентга соат 12:20 да қўнади.
Тошкент-Самарқанд йўналиши бўйича авиачипта нархи 104 минг сўмдан бошланади. Тошкент-Самарқанд-Тошкент йўналиши бўйича авиачипта нархи 182 минг сўмдан бошланади.
Июнь ойида Uzbekistan Airways Чехиянинг LET Aircraft Industries заводи билан иккита Let L-410 UVP-E20 турбовинтли самолёт сотиб олиш бўйича шартнома имзолаган эди. 15 июль куни биринчи самолёт Ўзбекистонга етиб келди.
LET L-410 «Турболёт» - маҳаллий авиакомпаниялар учун мўлжалланган, енгил, кўп мақсадли икки двигателли самолёт бўлиб, 1966-1967 йилларда Чехословакиянинг Let Kunovice авиация заводи конструкторлик бюроси (ҳозир Чехиянинг LET Aircraft Industries заводи) томонидан ишлаб чиқилган.
Самолёт махсус тайёрланмаган, асфальтланмаган, ўтлоқли йўлакларда, қорли ҳудудларда, шунингдек, қисқа учиш-қўниш йўлаклари бўлган аэродромлардан учиш учун мўлжалланган. 19 йўловчи ёки 1,8 тонна юкни 1500 км масофага ташишга қодир.
