Трампнинг махфий ҳужжатлар бўйича суди президентлик сайловидан олдин бошланади 

АҚШ собиқ президенти Доналд Трамп 2024 йил май ойида махфий ҳужжатларни ноқонуний сақлаш иши бўйича судга тортилади. Жараён президентлик сайловига бир неча ой қолганида бошланади. 

Трамп адвокатлари ҳар қандай суд жараёни 2024 йил ноябрида бўлиб ўтадиган АҚШ президенти сайловидан кейин ўтказилиши кераклигини таъкидлаётган эди. Федерал прокурорлар суд жараёнини декабрга белгилашни сўраганди. Бироқ, Флорида штати, Форт-Пирс шаҳри судьяси Эйлин Кэннон суд жараёни 2024 йил 20 майда бошланиши ҳақида қарор қабул қилди. 

2023 йил 8 июнь куни Доналд Трамп АҚШ президенти лавозимини тарк этганидан кейин миллий хавфсизликка оид ҳужжатларини ноқонуний сақлаш ва уларни қайтаришга уринган амалдорларга ёлғон гапиришда айбланган. 

Тергов маълумотларига кўра, собиқ президент кўплаб махфий файл ва ҳужжатларни Мар-а-Лагодаги уйига олиб кетган. Бундан ташқари, у ҳужжатларни полициядан яширишга уринган. 

10 июнь куни федерал прокурорлар жиноят иши бўйича айблов хулосасини эълон қилишди. Собиқ президент 37 та модда бўйича айбланмоқда. 

Трамп барча айбловларни рад қилмоқда. У уйида «анча-мунча» нарсани сақлаётганини, уларни тартибга солиш ва шахсий нарсаларини ажратиб олиш учун вақт кераклигини айтган. 

Бундан ташқари, Трамп бошқа жиноят иши бўйича 2024 йил 25 март куни суд олдида жавоб бериши керак. У порноактрисага махфий тўловларни яшириш учун бизнес ёзувларини сохталаштирганликда айбланмоқда.