Самарқандда вазни 2,2 кг картошка етиштирилди 

Самарқанд илмий тажриба станциясида вазни 2,2 килограммга етадиган картошка етиштирилмоқда. Картошка ҳосили 50-52 тоннани ташкил қиляпти. 2023 йил ҳосили учун 11 гектар майдонда картошканинг «Боғизоғон», «Раноми», «Эволюшн», «Аризона», «Силвана» ва «Лусинда» навлари экилган. 

Қайд қилинишича, картошка нафақат тўйимлилиги, балки шифобахшлиги билан ҳам ўзига хос. Унинг таркибида оқсил, ёғ, углеводлар, органик кислоталар, В1, В2, РР, С, D, K, E, A витаминлари, натрий, калий, магний, кальций, темир, фосфор, йод каби элементлар мавжуд. 

Хабарга кўра, илмий тажриба станциясида картошка ҳосилдорлиги йилдан йилга ошиб бормоқда. Бунинг сабаблари сифатида алмашлаб экишнинг тўғри йўлга қуйилгани, картошка етиштиришда ўтмишдош экинлар тўғри танлангани, экиш муддати, меъёрига риоя қилиниши, энг асосийси, картошка етиштиришда инновацион ёндашиб, суғориш ва ўғитлашнинг, томчилатиб ва ёмғирлатиб суғориш усуллари орқали бир пайтда ўтказилгани, ўсимликнинг вегетация даврида 2-3 бор таркибида микро ва макроэлементлар мавжуд бўлган озуқалар билан суспензия қилингани кўрсатилган. 

Картошканинг Ўзбекистон ҳудудида экиш учун тавсия этилган 131 та нави давлат реестрига киритилган, шундан 19 таси маҳаллий илмий тадқиқот институтлари томонидан яратилган.