Трамп иши бўйича суд: АҚШ собиқ президенти ўз айбини рад этяпти

Доналд Трампга Капитолий биносига бостириб кириш ва 2020 йилги сайлов натижаларини бекор қилишга уринганлик бўйича айблов қўйилди. АҚШ собиқ президенти ўзининг айбсизлигини таъкидлаяпти.

Фото: Alex Brandon / AP

АҚШ собиқ президенти Доналд Трамп 3 август, пайшанба куни Вашингтондаги Колумбия округи федерал судининг Капитолийга бостириб кириш ва 2020 йилги сайлов натижаларини бекор қилишга уриниш бўйича ишни кўриб чиқаётган биринчи мажлисига келди. Мажлисда Трампга 2020 йилги сайловларда мағлуб бўлганига қарамай, ҳокимиятда қолишга уринганлиги ҳақидаги расмий айблов ўқиб эшиттирилди. Собиқ президент АҚШга қарши фитна, сайловчиларни алдаш каби тўртта модда бўйича айбланмоқда. Трамп ўз айбини тан олишдан бош тортди, дея хабар беради dpа.

АҚШ собиқ президентига Колумбия округидаги судда гувоҳлик бериш учун келиш, шунингдек, иш бўйича маълумотларни ошкор қилмаслик буюрилган. Шу билан бирга, прокурорлар суд жараёни бошлангунга қадар Трампни ҳибсга олишга уринмади, унинг санаси навбатдаги мажлисда, 28 августда белгиланади.

Суд биносидан чиқиб кетаркан, Доналд Трамп сайловолди ташвиқотига зарар етказиш мақсадида уни таъқиб қилишаётганини айтди. «Бу Америка учун жуда қайғули кун», деб қўшимча қилди собиқ президент.

Айбловга кўра, 2021 йилнинг 6 январида Трамп ва унинг шериклари президентлик сайловларида сохта баёнотлар тарқатиш, шунингдек, зўравонлик ва тартибсизликларни келтириб чиқариш орқали расмий овоз бериш натижаларини бекор қилишга уринган. Махсус прокурор Жек Смитга кўра, айнан Трампнинг ёлғонлари Капитолийга ҳужумга сабаб бўлган бўлиши мумкин.