АҚШ Ўзбекистондан одам олиб киришга уринган контрабандачиларни ушлади

Жиноий тармоқ аъзоларидан камида бир нафари хорижий террорчилик ташкилотига алоқадорлиги айтилмоқда.

Фото: AFP/Getty Images

АҚШ Ўзбекистондан Америкага одамларни ноқонуний олиб киришга уринган контрабандачилар гуруҳини қўлга олди.

Оқ уйнинг маълум қилишича, ушбу тармоқ азоларидан камида бир нафари хорижий террорчилик ташкилотига алоқадор.

Миллий хавфсизлик кенгаши баёнотида айтилишича, АҚШ расмийлари контрабанда тармоғидан фойдаланган Ўзбекистон фуқаролари террорчилар билан алоқада бўлган ёки терактни режалаштирган деб ҳисобламайди.

Баёнотда хориж террорчи ташкилотининг номи аниқ кўрсатилмаган, бироқ АҚШ расмийси Associated Press нашрига бу ИШИД эканини айтган.

Таъкидланишича, Қўшма Штатлар тармоқнинг асосий аъзоларини, жумладан, хорижий террорчилар билан алоқадор шахсни қўлга олиш учун бошқа давлатлар ҳукуматлари билан ҳамкорлик қилган.