ЕИ Россияда рўйхатдан ўтган автомобилларни олиб кириш тақиқланганини тасдиқлади

Европа комиссияси Германияда бир неча ой давомида қўлланган санкция қонунчилигининг талқинини тасдиқлади, унга кўра Россияда рўйхатдан ўтган автомобиллар билан Европа Иттифоқига кириш тақиқланган импорт сифатида қабул қилинади. 8 сентябр, жума куни идора бу борада энг кўп берилган саволларга жавоб қайтарар экан, Европа Иттифоқи кенгашининг санкциялар рўйхатига киритилган товарларни олиб кириш, сотиб олиш ва ташиш бўйича қарорлари юзасидан тушунтиришларни эълон қилди. Ҳужжатдан келиб чиқишича, ҳар қандай, жумладан, шахсий мақсадларда фойдаланиладиган автомобилларни ҳам олиб кириш тақиқланади.

Бунда, Россияда рўйхатдан ўтган автомобилнинг қайси муддатга олиб кирилгани, шунингдек, божхона тартиб-қоидаларининг тури – эркин муомала ёки вақтинчалик олиб кирилгани муҳим эмас, деб тушунтирди Брюссел. Шу тариқа, Европа комиссияси Германияда Европа Иттифоқининг санкция қонунчилигини талқин қилиш бўйича ўз позициясини аниқлаштирди, у юристлар орасида автомобилларни импорт қилиш ва шахсий автомобил билан мамлакатга кириш ўртасидаги фарқ ҳақида саволлар туғдирган.

Тақиқ косметика, чамадон, ноутбук ва телефонларга ҳам тааллуқли

Бундан ташқари, Европа комиссиясининг тушунтиришида Россиядан Европа Иттифоқининг 833/2014-сонли директиваси 3i моддасига XXI иловада санаб ўтилган бошқа товарларни олиб кириш тақиқланган импорт сифатида кўриб чиқилиши мумкинлиги тасдиқланди. Бошқа нарсалар қаторида, Россияга қарши санкция қоидаларига иловага косметика, чамадонлар, сумкалар, рюкзаклар, ҳамёнлар, бир қатор кийим-кечак буюмлари, ноутбуклар, камералар, мобил телефонлар, чарм ва мўйна маҳсулотлари, ярим қимматбаҳо ва қимматбаҳо тошлар киради. 

Россия фуқаролари, масалан, сайёҳлик мақсадларида, Европа Иттифоқига иловада кўрсатилган шахсий буюмлар ва транспорт воситаларини вақтинча олиб кириши мумкинми, деган саволга Европа комиссияси салбий жавоб берди. Брюсселдаги Acquis юридик фирмасининг ҳамкори, санкциялар бўйича мутахассис Юрий Шумилов РБК’га 3i моддасининг XXI иловасида келтирилган косметика, чамадонлар, ноутбуклар ва мобил телефонлар тақиқ остида эканини тасдиқлади. Шумиловнинг сўзларига кўра, Европа божхона органлари ушбу шахсий буюмларни чегарадан ўтказишга рухсат бермаслиги мумкин. 

Олиб киришга тақиқ шахсий тилла буюмларга тааллуқли эмас 

Шу билан бирга, ҳужжат Европа Иттифоқи фуқаролари ва уларнинг яқин қариндошлари учун ушбу қоидадаги истиснони кўрсатади. Айни пайтда, Европа Иттифоқига олиб киришни тақиқлаш, хусусан, ЕИга саёҳат қилувчи жисмоний шахслар томонидан шахсий фойдаланиш учун олтин тақинчоқларга, агар бу нарсалар уларга тегишли бўлса ёки сотиш учун мўлжалланмаган бўлса, тааллуқли эмас. Шу тариқа, ушбу объектлар Россия олтинининг Европа Иттифоқига импорти бўйича чекловлар доирасига кирмайди.

Еврокомиссия санкцияларнинг мақсади Россия иқтисодиётини сезиларли даражада заифлаштириш ва Россияни ўз маҳсулотлари учун энг муҳим бозорлардан маҳрум қилиш, уруш олиб бориш қобилиятини сезиларли даражада чеклаш эканини эслатди. Шу сабабли, санкция қонунчилигининг бошқа ҳар қандай талқини ушбу тақиқларни ўз мазмунидан маҳрум қилади ва уларни четлаб ўтиш учун катта имкониятлар яратади, деб ҳисоблайди идора. 

Германияда Россия автомобилларининг оммавий хатловга олиниши ҳақида мунозаралар 

Ёз бошида немис божхоначилари томонидан Россия давлат рақамларига эга бўлган автомобиллар - чегарада ҳам, Германиянинг ўзида ҳам киргандан кейин оммавий хатловга олингани ҳақида хабарлар тарқалди. Бошқа нарсалар қаторида, Россияда рўйхатдан ўтган Европа Иттифоқи фуқароларига тегишли автомобилларнинг хатловга олиниши ҳолатлари маълум бўлди, уларнинг бир қисми Германиядан транзит орқали ўтмоқда. Германия ҳукумати Европа Иттифоқи санкцияларига амал қилинаётганини билдирган.

Июн ойи охирида DW сўровига жавобан, Германия божхона бошқармаси илгари жорий қилинган Европа Иттифоқи санкцияларига, яъни 2014 йил 31 июлдаги ЕИ буйруғига ва 2022 йилда қабул қилинган санкциялар тўпламига риоя этилишини тушунтирди. У Россиядан Европа Иттифоқига олиб кириш тақиқланган нарсалар рўйхатини кенгайтирди. Ушбу рўйхатга, жумладан, автомобиллар ва юк машиналари киради. «Тақиқ субъектив ниятлардан қатъи назар амал қилади», деб таъкидлади маҳкама. Шу билан бирга, DW аввалроқ ёзганидек, агар санкция қоидаларига Германия божхона хизмати тушунадиган тарзда амал қилинса, россияликлар ҳеч қандай шахсий нарсаларни, шу жумладан чамадонларни ҳам Европа Иттифоқига олиб кириши мумкин эмас. DW’нинг божхона ходимларининг қарори таржима хатоси натижаси эканига оид қўшимча саволига жавобан, идора инглизча матн билан ҳеч қандай номувофиқликлар йўқлигини билдирди. Унга кўра, санкцияларнинг немисча матнида «импорт» эмас, балки «олиб кириш» (Einfuhr) таърифи қўлланган.