Ўзбекистон Американинг General Electric компанияси билан 60 млн долларлик шартнома имзолади

Компания Ўзбекистондаги электр станциялари энергоблокларини модернизация қилади.

Президент Шавкат Мирзиёевнинг Қўшма Штатларга ташрифи доирасида ташкил этилган АҚШ-Ўзбекистон бизнес форумида «Ўзбекенерготаъмир» АЖ ва General Electric компанияси 60 млн долларлик шартнома имзолади.

Қайд қилинишича, мазкур ҳамкорлик Ўзбекистондаги электр станциялари энергоблоклари модернизациясини амалга оширишга қаратилган. Шартнома доирасида электр станцияларига техник хизмат кўрсатишдан ташқари, янги эҳтиёт қисмлар етказиб берилади ва демонтаж қилинган эҳтиёт қисмларини тиклаш ишлари амалга оширилади.

«Ўзбекенерготаъмир» АЖ бош директори Илҳом Ражабов сўзларига кўра, ҳамкорлик натижасида электр энергиясининг якуний нархи пасайишига эришилади.

«Бу билан мамлакатимиз электр энергетикаси тармоғига замонавий, юқори ривожланган ва энергосамарадор ускуналарни олиб кирамиз, соҳадаги энг илғор технологияларни ўзимизда жорий этиш, натижада ёқилғи сарфини камайтириш ва ишлаб чиқаришни рақамлаштириш эвазига маҳсулотнинг якуний нархини пасайтиришга эришамиз», деди у.

Шунингдек, ҳамкорлик доирасида «Ўзбекенерготаъмир» ёш ходимлари америкалик мутахассислар иштирокида бажариладиган таъмирлаш ва созлаш ишлари орқали ўз малакасини ошириши ҳам айтилмоқда.

General Electric – Американинг кўптармоқли корпорацияси бўлиб, кўплаб техникаларни, жумладан, авиация двигателлари, энергетика ускуналари, атом реакторлари ва газ турбиналарини ишлаб чиқаради. 2023 йил март ойига капитализацияси 98,4 млрд долларни ташкил қилган.