Самарқанд 2025 йилда Ислом дунёси маданият пойтахти мақомини олади

Бу Қатарда ўтказилаётган Ислом дунёси маданият вазирлари конференциясида тасдиқланди.

Фото: orexca.com

Самарқанд шаҳри 2025 йилда Ислом дунёси маданият пойтахти мақомини олади. Бу ҳақда Маданият вазири Озодбек Назарбеков маълум қилди.

Таъкидланишича, 25 сентябрь куни Қатарда XXII Ислом дунёси маданият вазирларининг «Ислом оламида маданий тадбирларнинг янгиланиши томон» мавзусидаги 12-конференцияси ўз ишини бошлади.

Конференция кун тартибида дунё маданий сиёсатининг етакчи тамойиллари ва барқарор ривожланиш кўрсаткичлари, ислом оламида инсониятнинг барҳаёт бойликлари ва анъанавий билимларини қадрлаш, маданий бойликларнинг ноқонуний айланишига қарши курашишга оид қатор масалалар муҳокама этилди.

«Энг муҳими, конференция доирасида 2025 йил Самарқанд Ислом дунёси маданият пойтахти деб тасдиқланди. Бу мақом бизга яна бир карра дунёга маданий меросимизни намоён этиш имконини тақдим этади», деб ёзди вазир.

Эслатиб ўтамиз, 2024 йилда Ислом дунёси маданият пойтахти мақомини Озарбойжоннинг Шуша шаҳри олган.