ЕИ: Яқин Шарқдаги вазиятнинг кескинлашуви Киевга ёрдамга таъсир қилмайди

Украинага қарши урушда Россия ҳар қандай халқаро ўзгаришлардан манфаат кўришга ҳаракат қилмоқда, бироқ Европа Иттифоқининг Украинани қўллаб-қувватлашига ҳеч нарса таъсир қилмайди, деди 9 октябр, душанба куни Еврокомиссия расмий вакили Эрик Мамер. У DW мухбирининг Яқин Шарқдаги можаро авж олиши Украинага ёрдамга қандай таъсир қилади, деган саволга: «Ёрдам давом этишига заррача шубҳа бўлиши мумкин эмас», деб жавоб берди.

У Еврокомиссия раҳбари Урсула фон дер Ляйеннинг 7 октябр куни Бордодаги нутқига ишора қилди. «Россия билан можарода биз Украина халқини керак бўлгунича қўллаб-қувватлаймиз», - дея Мамер унинг сўзларини келтирган. Унинг фикрича, Исроил ва ҲАМАС ўртасидаги зиддият кучайиб бораётгани Европа Иттифоқининг Украинага кўрсатаётган ёрдамига ҳеч қандай алоқаси йўқ. 

Билдирилишича, Европа Иттифоқи ташқи ишлар вазирларининг 10 октябр куни бош дипломат Жозеп Боррел томонидан чақирилган фавқулодда норасмий йиғилиши ҳозирча кун тартибига эга эмас. «Учрашувдан мақсад (Исроил ва Фаластин маъмуриятида) нима бўлганини ва Европа Иттифоқининг жавоби қандай бўлиши кераклигини муҳокама қилиш, - деди Петер Стано. - Мен вазирлардан нима бўлаётганини барча жиҳатлари ва бутун контекстини муҳокама қилишини кутаман. Исроил ва ҲАМАС ўртасидаги ҳозирги қарама-қаршилик нуқтаи назаридан вазиятни ўрганиш керак». Унинг қўшимча қилишича, Европа Иттифоқи мамлакатлари ташқи ишлар вазирлари ўз учрашувларида доимо Украина мавзусини муҳокама қилади, чунки бу жуда муҳим. 

«Албатта, Россия халқаро миқёсда содир бўлаётган ҳамма нарсадан, беқарорликни ёки Украинага қарши кампанияни кучайтириш учун фойдаланишга ва суиистеъмол қилишга ҳаракат қилмоқда. Лекин бу Европа Иттифоқи Украина мавзусидан узоқлашади дегани эмас», - деди Стано. 

Бир кун аввал Америка Қўшма Штатларидаги Урушни ўрганиш институти (ISW) ҲАМАС жангчиларининг Исроилга қилган ҳужумидан Москва АҚШ ва Украинанинг бошқа иттифоқчилари қўллаб-қувватлашини камайтириш мақсадида ахборот кампаниясини ўтказишда фойдаланаётгани ҳақида хабар берган эди. Хусусан, Россия Ғарбни Украинани қўллаб-қувватлаш фойдасига Яқин Шарқдаги можароларни эътиборсиз қолдирганликда айблагани ва гўёки тез орада халқаро ҳамжамият Украинага эътибор беришни тўхтатишини маълум қилгани қайд этилган.