Франциядаги аэропортлар ҳужум хавфи туфайли эвакуация қилинди

Францияда 18 октябр, чоршанба куни ҳужум таҳдиди туфайли бир қатор аэропортлар эвакуация қилинди. Улардан баъзилари текширувдан сўнг яна нормал иш фаолиятини бошлади. Умуман олганда, мамлакат бўйлаб камида ўнта аэропорт зарар кўрди, аммо огоҳлантириш Парижнинг иккита халқаро аэропортига - Орли ва Шарл-де-Голл аэропортларига тааллуқли бўлмади.

Шу билан бирга, Париж яқинидаги Нант, Ницца, Тулуза ва Бове аэропортлари электрон почта орқали таҳдидлар келиб тушганидан кейин эвакуация қилинди. Ницца, Лион ва Лилл аэропортларида қисқа танаффусдан сўнг нормал фаолият қайта тикланди. Аэропорт маъмуриятининг таъкидлашича, Ниццада сигнал шубҳали чамадон туфайли юзага келган. Страсбург аэропорти ҳам электрон почта орқали келиб тушган таҳдиддан кейин эвакуация қилинган.

Европа ҳавода навигация хавфсизлиги ташкилоти (Eurocontrol) маълумотларига кўра, Франциядаги тўртта аэропорт тушгача ёпиқ қолган – Тулуза, Бове, Бордо ва По. Бундан ташқари, полиция маълумотларига кўра, Версал саройи сўнгги бир неча кун ичида хавфсизлик нуқтаи назаридан учинчи марта эвакуация қилинган. 

Террорчилик таҳдидининг максимал даражаси

Францияда 13 октябр, Аррас шаҳридаги мактабда ўқитувчи Доминик Бернар ўлдирилганидан бери террорчилик таҳдидининг максимал даражаси амалда. Ўшандан бери Париждаги Лувр музейи ва ўқитувчи пичоқ билан ўлдирилган Аррас лицейида эвакуация эълон қилинди, аммо барча сигналлар ёлғон бўлиб чиқди. 

Францияда бутун мамлакат бўйлаб етти минггача аскар жойлаштирилган. Исроил ва ҲАМАС ўртасидаги уруш фонида хавфсизлик чоралари кучайтирилди.