Мадридда полиция Украинадан олиб чиқиб кетилган қимматбаҳо буюмларни мусодара қилди

Мадридда полиция Украинанинг тарихий меросига тегишли бўлган ва мамлакатдан ноқонуний олиб чиқиб кетилган 11 та тилла буюмни мусодара қилди. Испания полициясининг 23 октябр, душанба куни эълон қилинган пресс-релизига кўра, ушбу заргарлик буюмларининг умумий қиймати 60 миллион евродан ошади.

Ҳужжатда айтилишича, операция давомида беш киши, жумладан, икки Украина фуқароси ҳибсга олинган. «Шу тариқа, Украинадан маданий бойликларни ноқонуний олиб чиқиб кетиш билан шуғулланган жиноий тармоқ йўқ қилинди», - дея маълумот берди Испания полицияси. Унга кўра, заргарлик буюмлари Мадридда сотувга тайёрлаб қўйилган бўлган.

Полиция Мадридда яшовчи Украина фуқароси Украинадан катта тарихий ва иқтисодий қийматга эга бўлган бир қанча тилла тақинчоқларни сотаётганини аниқлаганидан сўнг дастлабки тергов бошланди.

Заргарлик буюмларининг келиб чиқишини яшириш учун жиноятчилар улар Украина православ черковига алоқадорлигини тасдиқловчи украин, инглиз ва испан тилларида сохта ҳужжатлар билан бирга келган. Тергов қилинаётган асосий шахс Мадридда яшовчи православ руҳонийдир.

Қадимги юнон-скиф маданиятининг объектлари

Полиция ҳисоботига кўра, биринчи буюм - қўчқор бошли олтин камар 2021 йилда мусодара қилинган. Гумонланувчи уни испаниялик тадбиркорга хусусий равишда сотишга уринган. Тергов бошланганидан сўнг, полиция эркакнинг бошқа шунга ўхшаш қимматбаҳо буюмлари борлигини аниқлашга муваффақ бўлди.

Қайд этилишича, эрадан аввалги 8-4-асрларда юнон-скиф маданиятига оид заргарлик буюмлари Украинадан 2016 йилнинг майигача ноқонуний олиб чиқиб кетилган. Улар ҳозир Миллий археология музейи ва Испания маданий мерос институтида ўрганилмоқда. Уларни Украинадан ноқонуний олиб чиқиб кетиш ва сотишга уриниш бўйича тергов давом этмоқда.