Путин ядро синовини тақиқлаш тўғрисидаги шартнома ратификациясини бекор қилувчи қонунни имзолади

Россия президенти Владимир Путин қонунни имзолади, унга кўра Москва ядровий синовларни тўлиқ тақиқлаш тўғрисидаги шартнома (ЯСТТШ) ратификациясини қайтариб олади. Тегишли ҳужжат расмий ҳуқуқий ахборот порталида эълон қилинди.

Шартнома Россия Федерацияси номидан 1996 йил 24 сентябрда Ню-Йоркда имзоланган ва 2000 йил 27 майда Россия томонидан ратификация қилинган. Ушбу кўп томонлама ҳужжат барча турдаги ядро синовларини тўхтатиш учун асосий халқаро ҳуқуқий ҳужжат бўлиши керак эди.

Бироқ шу кунгача шартнома кучга кирмади, чунки ядро қуролига эга ёки уни яратиш салоҳиятига эга 44 давлатдан саккизтаси уни ратификация қилмаган.

Иловадаги материалларда қайд этилишича, қабул қилинган қонун ядро қуролларини назорат қилиш соҳасидаги мажбуриятлар тенглигини тиклаш учун ишлаб чиқилган. Шу билан бирга, аниқлик киритилишича, ҳужжат Россиянинг ратификация ёрлиғини қайтариб олиш учун ҳуқуқий асос яратади, бироқ мамлакатнинг ЯСТТШдан чиқишини назарда тутмайди.

Қонун расмий эълон қилинган кундан эътиборан кучга киради. 

ЯСТТШ ратификациясини бекор қилиш ташаббуси Давлат думасига 13 октябр куни тақдим этилган. 

Федерация кенгаши сенаторлари 25 октябр куни Россия Федерациясининг ядровий синовларни тақиқлаш тўғрисидаги шартнома ратификациясини қайтариб олишини бир овоздан маъқуллади.