Эрдўған энди Нетаняҳу билан мулоқот қилмаслигини айтди

«Биз уни унутдик», деди Эрдўған.

Фото: Adem ALTAN / AFP

Туркия президенти Ражаб Тоййиб Эрдўған энди Исроил ҳукумати раҳбари Бинямин Нетаняҳу билан мулоқот қилишдан бош тортишини айтди.

«Биз Нетаняҳу билан энди гаплаша олмаймиз. Биз уни унутдик», деб Эрдўған сўзларидан иқтибос келтиради Al-Arabiya телеканали.

Унинг сўзларига кўра, Исроил урушни тўхтатмаса ва «ҳарбий жиноятлар ва инсон ҳуқуқлари бузилиши» учун жавобгарликка тортилмаса, Туркия дунё глобал тизимига ишонмайди.

Эрдўған аввалроқ Исроилни Ғазога қарши давом этаётган ҳужумларни тўхтатишга ва «ақлдан озиш ҳолатидан чиқишга» чақирган эди.

Бу сўзларга қарамай, Туркия Исроил билан муносабатларни бутунлай узмоқчи эмас.

4 ноябр куни Туркия Ғазо секторидаги гуманитар ҳолат фонида Исроилдаги элчиси Шокир Ўзкон Тўрунларни «масалаҳатлашув» учун чақириб олди.

Тайёрлаган Сардор Юсупов

#Туркия #Исроил #Бинямин Нетаняҳу #Ражаб Тоййиб Эрдўған

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.