ОАВ: Исроил ва “Ҳизбуллоҳ” ўртасида сулҳ тузилди

Reuters агентлиги ва Sky News телеканали америкалик манбага таяниб хабар беришича, томонлар 19 июн куни ўт очишни тўхтатишга розилик билдирган. Кейинчалик бу маълумотни юқори лавозимли исроиллик амалдор ҳамда “Ҳизбуллоҳ”га яқин икки манба тасдиқлаган.

Манбаларга кўра, келишув маҳаллий вақт билан куннинг иккинчи ярмида кучга кирган. Исроил расмийси “агар ʼҲизбуллоҳʼ ҳужум қилмаса, биз ҳам ҳарбий ҳаракатларни давом эттирмаймиз”, деб маълум қилган. Шу билан бирга, Исроил мудофаа армияси (ЦАҲАЛ) Ливаннинг жанубий ҳудудларида қолиши таъкидланган.

Бироқ сулҳ бошланган дастлабки соатларда ҳам вазият тўлиқ барқарорлашмаган. Ливан хавфсизлик идораларидаги икки манбанинг билдиришича, ўт очишни тўхтатиш режими кучга кирганидан кейинги биринчи соат ичида Исроил томонидан ўндан ортиқ ҳаво зарбалари амалга оширилган. Кейинчалик бундай ҳолатлар қайд этилмаган.

Байрут расмийлари яна бир дрон ҳужуми оқибатида мамлакат жанубида мотоциклда кетаётган икки киши ҳалок бўлганини маълум қилди. Аммо Исроил томони сулҳ кучга кирганидан кейин зарбалар берилганини рад этди ва келишув бузилмаганини билдирди.

Аввалроқ Reuters агентлиги Ливан парламентидаги “Ҳизбуллоҳ” вакили Ҳасан Фадлаллага таяниб, Эрон ҳаракат раҳбариятига АҚШ билан музокараларни давом эттириш учун барча фронтларда, жумладан Ливанда ҳам ўт очиш тўлиқ тўхтатилиши шартлигини маълум қилганини хабар қилган эди.

Америкалик юқори лавозимли манбанинг айтишича, айнан шу шарт асосида АҚШ, Қатар, Эрон ва бошқа воситачилар иштирокидаги музокаралар орқали Исроил ва “Ҳизбуллоҳ” келишувга эришган.

Кузатувчилар фикрича, мазкур сулҳ Вашингтон ва Теҳрон ўртасидаги музокаралар тақдири учун ҳам муҳим аҳамиятга эга. Чунки 17 июн куни АҚШ ва Эрон ўртасида масофавий тарзда имзоланган англашув меморандумида барча фронтларда зудлик билан ўт очишни тўхтатиш асосий шартлардан бири сифатида белгиланган.

Ҳужжатга мувофиқ, томонлар 60 кун давомида якуний тинчлик келишувини ишлаб чиқиши лозим. Бироқ Ливандаги жанглар давом этгани сабабли 19 июн куни Швейцарияда ўтказилиши режалаштирилган АҚШ ва Эрон делегациялари учрашуви кейинроққа қолдирилган.

Эроннинг Tasnim агентлиги маълумотига кўра, Теҳрон музокараларнинг кейинги босқичига ўтишдан аввал АҚШ меморандум шартларини бажараётганини амалий жиҳатдан кўришни истамоқда. Доналд Трамп эса музокаралар кечиктирилганидан сўнг Эронни танқид қилиб, кейинги 60 кунлик жараён қандай кечишини Вашингтон белгилашини таъкидлаган.