Латвия Сейми собиқ депутати Россия фойдасига жосуслик қилгани учун қамалди

Рига шаҳар суди Латвия Сеймининг собиқ депутати Янис Адамсонс ва Латвия ССР КГБда ишлаган Россия фуқароси Геннадий Силоновни Россия фойдасига жосуслик қилишда айбдор деб топди, деб хабар берди 9 ноябр, пайшанба куни LSM.lv телеканали.

Суд Адамсонсни икки йил синов муддати билан 8 йил-у 6 ойга, Силоновни эса 7 йил-у 6 ойга, шунингдек, икки йил муддатга синов назорати остидаги қамоқ жазосига ҳукм қилди.

Адамсонс 2021 йил июн ойида Россия фойдасига жосусликда гумонланиб ҳибсга олинган эди. Тергов маълумотларига кўра, Сейм собиқ депутати «тизимли ва мақсадли» тарзда Силонов орқали Россия махсус хизматларига НАТО бўлинмалари, Латвия ҳарбий харидлари, мамлакат бюджети, қонунларга киритилган ўзгартиришлар ва чегарадаги вазият ҳақида маълумот тўплаган ва узатган.

Адамсонс Силонов билан камида 2015 йилдан бери учрашиб келган, Латвия ҳуқуқ-тартибот идоралари жами 100 дан ортиқ бундай учрашувларни қайд этган. Прокурор сўзларига кўра, Адамсонс жосуслик учун тўловлар олган ва пул Адамсонснинг Россиядаги қизига ўтказилган.

Адамсонс ва Силонов айбловларни рад этяпти

Ҳар икки маҳкум ўзига қўйилган айбловларни рад этди ва суд қарорини «бутунлай уйдирма» деб атади. Эркак бир-бирини билишини ва дўст эканини инкор этмади, лекин жосусликда иштирок этмаганини ва Россия махсус хизматлари билан алоқаси йўқлигини даъво қилди.

Прокурорнинг Силонов Адамсонснинг қизига «тўловлар»ни ўтказгани ҳақидаги даъвосини судланувчилар «бемаънилик» деб атаган. Уларнинг сўзларига кўра, Адамсонснинг ўзи Силоновга пул берган - одатда ҳар бир неча ойда 100-200 евро, у Адамсонснинг Россиядаги қизи ҳисоб рақамига ўтказиш учун мўлжалланган. Маҳкумларнинг ҳимояси ҳукм устидан шикоят қилиш ниятида эканини айтди.

Адамсонс 1992 йилгача Узоқ Шарқда чегара қўшинларида хизмат қилган. СССР парчаланганидан кейин у Латвияга қайтиб келди ва у ерда 1994 йилда мамлакат ички ишлар вазири бўлди. 1995 йилда у бу лавозимни тарк этди ва Латвия Сеймига депутат бўлди. Парламентда у мудофаа, ички ишлар ва коррупциянинг олдини олиш бўйича Сейм комиссияси аъзоси ҳисобланган, аммо давлат сирларини ўз ичига олган маълумотларга кириш имконига эга бўлмаган, деб таъкидлайди LETA ахборот агентлиги. Ҳибсга олинганидан сўнг Адамсонс парламентда вакили бўлган «Розилик» социал-демократик партиясини тарк этди.