ОТБ Ўзбекистонга қаттиқ маиший чиқиндиларни барқарор бошқаришда ёрдам беради

Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов Осиё тараққиёт банки Сув ва шаҳарсозликни ривожлантириш сектори катта директори Норио Саито билан учрашди.

БМТнинг чўлланиш, ерларнинг деградацияси ва қурғоқчиликка қарши конвенцияси ижросини кўриб чиқиш қўмитаси 21-сессияси доирасида ташкил этилган учрашувда Азиз Абдуҳакимов Осиё тараққиёт банки билан самарали ҳамкорлик ўрнатилганини алоҳида таъкидлади.

Учрашув давомида шаҳарларни комплекс ривожлантириш, экология соҳасидаги ходимлар малакасини ошириш, Япониядаги чиқиндини қайта ишлаш соҳасидаги компанияларни Ўзбекистонга жалб қилиш каби долзарб масалалар муҳокама қилинди.

Норио Саито 2025–2026 йилларга мўлжалланган «Қаттиқ маиший чиқиндиларни барқарор бошқариш» лойиҳаси 2-босқичини бошлаш таклифини билдирди. 

Япониядаги чиқинди соҳасида етакчи компанияларни Ўзбекистонга жалб қилиш, соҳада Осиё тараққиёт банки томонидан инвестицияларни олиб кириш, грантлар ажратилиши ҳамда вазирлик ва қуйи ташкилотлар ходимлари малакасини ошириш борасида ўзаро ҳамкорлик қўллаб-қувватланадиган бўлди.

Маълумот учун, ОТБ томонидан Марказий ҳамда Ғарбий Осиё ҳудудларида амалга оширилаётган лойиҳаларнинг 17 фоизи Ўзбекистонга тўғри келмоқда. Мамлакат минтақада бу кўрсаткич бўйича иккинчи ўринда. Жорий йилда жами 3,5 миллиард долларга яқин миқдорда 25 та лойиҳа имзоланган.

Шунингдек, Самарқандда БМТнинг чўлланиш, ерлар деградацияси ва қурғоқчиликка қарши конвенцияси ижросини кўриб чиқиш қўмитаси 21-сессияси доирасида маҳаллий ва халқаро олимлар, мутахассислар иштирокида илмий анжуман бўлиб ўтди.

«Тадбирда асосий масала қурғоқчилик, ерларнинг деградацияси ва чўлланишга қарши курашда таълим, илм-фаннинг аҳамиятини ошириш, инновацион ёндашувларга қаратилди, — деди Атроф-муҳит ва табиатни муҳофаза қилиш технологиялар илмий-тадқиқот институти директори Бахтиёр Пўлатов. — Чет эллик мутахассисларга юртимизда қилинаётган ишлар ҳақида маълумот бердик. Уларга, Орол денгизи ҳудудида чўлланишга қарши олиб борилаётган ишлар, айниқса, жуда кўп миқдорда саксовул ўсимлиги экилаётганлиги маъқул келди.  Бугунги кунда чўлланишга қарши курашда сув ресурсларини сақлаб қолиш жуда муҳим ҳисобланади. Олимлар билан муҳокамаларда шу мавзуга ҳам эътибор қаратдик».

Музокаралар давомида чанг ва қум бўронлари асосий эътибор қаратилиши керак бўлган масалалардан экани таъкидланди.

«Чўлланиш ва қурғоқчиликка қарши курашда инновациялар ва янги технологиялар жуда муҳим ҳисобланади. Биз турли хил амалиётларнинг биофизик ва ижтимоий-иқтисодий жиҳатларини кўриб чиқдик, қум ва бўронларнинг қайноқ нуқталарини аниқлаш каби масалаларни кўриб чиқдик, — деди БМТнинг Озиқ-овқат ва қишлоқ хўжалиги ташкилоти вакили Ферас Зиадат. — Мақсадимиз қум ва чангни келтириб чиқарадиган омилларни аниқлаш ва бартараф этишдир. Чунки бу нафақат Марказий Осиё, балки бошқа қитъаларга ҳам салбий таъсир кўрсатмоқда. Хусусан, қум ва чанг бўрони дунёнинг 151 га яқин давлатига таъсир қилмоқда».

Тадбир якунида чўлланиш, қурғоқчиликка қарши келажакда қилиниши керак бўлган ишлар белгилаб олинди.