Докторантурада ўқиш учун пастроқ даражадаги тил сертификати қабул қилиниши мумкинми?

Бир гуруҳ талабгорлар Kun.uz’га мурожаат қилиб, олий таълимдан кейинги таълимда илмий изланишларини олиб борувчилар учун тил сертификати даражаси талаби бўйича таклифларини ёзишган. Мурожаатчилар олий таълимдан кейинги таълим учун Б1 даража сертификати бор талабгорларни шартли равишда қабул қилинишини ва бунда талабгорга 1-курсни тамомлагунга қадар Б2 тил сертификати олиш шарти қўйилиб, танловда иштирок этишга имкон берилишини сўрашган.

Қайд этиш жоиз, президентнинг 2021 йилдаги тегишли қарорида олий таълимдан кейинги таълимга ҳужжат топшириш учун нофилологик йўналишлар учун камида Б2 даражадаги чет тилини билиш сертификати талаб қилиниши белгилаб қўйилган.

Kun.uz мурожаат бўйича Олий таълим, фан ва инновациялар вазирлиги мутахассисларидан жавоб олди. Вазирлик вакили Баркамол Пирматов докторантурага қабул бўйича тегишли қарор борлигини ва ҳозирча ҳеч қандай истисно ҳолат кутилмаётганини маълум қилди.

Шунингдек, у бу қарор қабул қилиниши натижасида, айрим илмий изланувчиларга ноқулайлик туғдиргани сабаб уларга айрим енгилликлар берилаётганини ҳам қўшимча қилди. “Масалан, докторантурага 2023/2024 йиллар учун қабул 15 сентябрдан 15 октябргача эди, лекин биз талабгорларга кўпроқ имкон бериш учун ариза бериш муддатини 10 ноябргача узайтирдик. Бундан ташқари, имтиёз асосида ҳам изланувчилар қабул қилиняпти”, – дейди Пирматов.

Мутахассис айни дамда вазирликда докторантура йўналишлари учун қабулда тил сертификатини табақалаштириш, яъни айрим йўналишлар учун Б1 даража тил сертификати ҳам тан олиниши бўйича норматив ҳужжатлар тайёрланаётганини маълум қилди. “Бу таклифимиз тасдиқдан ўтса, кейинги йилдан докторантларга яна енгилликлар берилиши мумкин”, – деди у.

Kun.uz мухбири вазирлик вакилига докторантура бўйича квота тўлмай қолса, кейинчалик кадрлар танқислиги масаласи ўртага чиқмайдими, деган савол билан мурожаат қилди. Пирматовнинг берган маълумотига кўра, ҳозир докторантурага ҳужжат топширишда бўш ўринлар фоизи паст.

“Умуман олганда бу йил докторантура йўналишида 91 фоиз ариза келиб тушган. Бу кўрсаткич, масалан, магистратурада 30-40 фоизни ташкил қилган. Лекин буни ҳам махсус комиссия кўриб чиқади. Улар иккинчи қабулга рухсат берса, яна қабул бўлади, бўлмаса, тўлмай қолган квоталар пули бюджет ҳисобида қолаверади”, – дейди мутахассис.