Трибунадаги тўқнашувдан кейин Месси жамоани майдондан олиб кетди. Аммо Аргентина қайтди ва яна Бразилияни енгди

Мессининг бразилиялик мухлислари

Бразилия — Аргентина 0:1
Гол: Отаменди (63). 
Бразилия – Алиссон, Эмерсон, Маркинос (Нино, 46), Габриэл (Жоэлинтон, 72), Аугусто, Гимараэс (Луис, 78), Андре, Рафиня (Эндрик, 72), Родриго, Мартинелли (Вейга, 78), Жезус.
Аргентина – Мартинес, Молина, Отаменди, Ромеро, Акуня (Таляфико, 66), Ло Челсо (Гонсалес, 70), Мак Аллистер, Де Паул, Фернандес (Паредес, 70), Месси (Ди Мария, 78), Алварес (Мартинес, 78).
Огоҳлантиришлар: Жезус (5), Рафиня (14), Аугусто (33).
Четлатиш: Жоэлинтон (81).

Бу ҳайратланарли кўриниши мумкин, аммо факт шуки, мухлислар роппа-роса икки йилдан буён Жанубий Америка классикаси гувоҳи бўлишмаганди. Олдинги саралаш циклида Аргентинадаги ўйинда голсиз дуранг қайд этилган, Бразилиядаги ўйин эса катта можаро туфайли ўтказилмай қолганди. Аниқроғи, ўйин бошлангани ҳамоно майдонга тиббиёт мулозимлари чиқиб келиб, рақиб сафидаги ўшанда мамлакатдаги коронавирус чекловларини бузган тўрт футболчини карантинга юборишни талаб қилганди. Ўйинни аввалига қолдиришганди, бу ўйинни ўтказишдан маъно қолмагач (икки жамоа ҳам йўлланма масаласини ҳал қилгач), КОНМЕБОЛ ўйинни умуман ўтказмай қўя қолганди.

Шундай экан, бу жамоалар футболини кўпчилик соғинганди. Аргентина бу циклдаги илк мағлубиятга қандай реакция қилишини кузатиш ҳам қизиқарли эди. Қаторасига уч учрашувни ғалабасиз ўтказган Бразилия инқироздан чиқиш учун қандай ҳаракат қилади? Икки ярим ҳафта олдин ўз бошқарувидаги «Флуминенсе» билан «Маракана»да Либертадорес кубогини қўлга киритган Фернанду Диниз нима ўйлаб топади? Ниҳоят, «Арсенал»нинг кескин норозилигига қарамай миллий жамоага чақирилган Габриэл Жезус пентакампеонларга ёрдам бера оладими? Форвард жароҳат туфайли жамоасининг бир қанча ўйинларини ўтказиб юборганди ва Аргентинага қарши ўйинга бир неча кун қолганида умумий гуруҳ билан машғулотларга қайтганди.

Ҳакамнинг ўйин бошланиши ҳақидаги ҳуштаги чалинишига оз вақт қолаётганида ижтимоий тармоқларда стадионга Мессининг номи битилган футболкалар ёки унга бағишланган плакатлар билан келган бразилиялик мухлисларнинг тасвирлари тарқалди. Лекин бу ажабланарли эмасди. 2021 йилги Америка Кубоги финали арафасида ҳам худди шу аренада шу каби манзара кузатилганди: улар Месси миллий жамоаси билан илк совринини қўлга киритиши учун Аргентинага мухлислик қилишганди.

«Ўйнамаймиз»

Лекин кўп ўтмай романтика ўрнини реаллик эгаллай бошлади. Аргентиналик фанатлар жойлашган секторда муштлашув юзага келди, Бразилия ҳарбий полицияси жанжални бостириш учун бор имкониятини ишга солди. Жанжалда айбдор бўлган радикал мухлислар ҳам, вазиятга умуман алоқадор бўлмаганлар ҳам калтаклардан бенасиб қолмади, бу эса вазиятни янада ёмонлаштирди. Бунга жавобан ҳуқуқ-тартибот органи ходимларига қарата юлиб олинган ўриндиқ учиб келди, натижада куч ишлатиш даражаси ошди. Айрим жабрланувчиларни замбилга солиб олиб кетишга тўғри келди, ҳодисанинг келиб чиқиш сабаби ҳақида турли версиялар пайдо бўла бошлади.

Аргентина матбуоти кутилганидек айбни полицияга ағдариб, қитъа клублари ўртасидаги турнирларда ҳам худди шундай бўлишини эслади. Аслида эса тартибсизликлар Бразилия мадҳияси янграётганида бошланганди. Маҳаллий нашрлар эса воқеани қуйидагича талқин этди: полиция, аксинча, аргентиналиклар мадҳияси бошланганида юзага келган можарога жуда кеч аралашган. Яъни уч дақиқа ўтганидан сўнг. Хавфсизлик даражасини эса бразилиялик фанатлардан бири полициячининг дубинкасини тортиб олиб, у билан ўз рақибини калтаклай бошлагани акс этган видео кўрсатиб беради.

Аммо бразилиялик журналистлар ва экспертлар анча эҳтиёткорлик билан сўз танлаб бўлса ҳам тан олишди: икки жамоа фанатларини бир трибунага ҳеч қандай тўсиқларсиз жойлаштириш — ақлсизликдир. Стюардлар фақат жанжал тугаганидан кейингина уларни ажратиб туришди. Шундай экан, нафақат полицияга, балки ўйин ташкилотчиси — Бразилия футбол конфедерациясига ҳам саволлар туғилади.

Ташкилот эса буни шундай изоҳлади: ўйин «Фламенго» ва «Флуминенсе» томонидан биргаликда бошқариладиган «Маракана» консорциум томонидан ўтказилган ва хавфсизлик ходимлари билан биргаликдаги йиғилишда клуб ўйинлари тажрибасидан келиб чиққан ҳолда меҳмонлар учун алоҳида сектор ташкил қилмасликка қарор қилинган. Шу билан бирга, стадионда полиция вакили сифатида ишлаган полковник Феррейра чипталар аралаш ҳолда сотилгани муаммо келтириб чиқарганини айтган, хавфсизлик ходимларининг ҳаракатлари эса рўй берган воқеадан келиб чиқиб амалга оширилгани ва бу тўғри бўлганини таъкидлаган.

Аргентиналик футболчилар эса трибуналар яқинига бориб, мухлисларга куч ишлатишни бас қилишни талаб қилди, дарвозабон Эмилиано Мартинес мухлислар секторига чиқишга уринди ва полициячилардан бири мухлисни уришига халақит берди. Месси эса сардор сифатида жамоасини майдондан олиб чиқиб кетгач, бу сафар ҳам ўйин қолдирилиши мумкин бўлган вазият юзага келди. «Биз кетамиз. Биз бундай шароитда ўйнай олмаймиз», — дея Леонинг сўзларини келтирган янгиликлар лентаси.

Мессисиз стандартлар

Риода барибир футбол ўйналди, аммо содир бўлган воқеа жиддий из қолдирди. Қолаверса, можаро авжига чиққанида Де Паул ва Жезус ўртасида тортишув юзага келди: бразилиялик футболчи провокацион жест намойиш этди. Ўйин бошлангач ҳам ушбу қарама-қаршилик давом этди, натижада бразилиялик форвард сариқ карточка олди, унинг рақиби эса бурни қонга белангани туфайли футболкасини алмаштиришига тўғри келди.

Бундан ташқари, ўйин бошланишидан олдин Родриго ва Месси баланд оҳангда сўзлашишди, биринчиси рақибни қўрқоқликда айблади, Лео эса шундай деб жавоб қайтарди: «Биз жаҳон чемпионларимиз. Нима деяётганингни биласанми? Тилингни тий». Ўйин бошланганида эса ҳар бир «тўқнашув» футболчилар чопиб келиб тўпланишига олиб келди. Биринчи бўлимда саралаш босқичи учун рекорд даражадаги 22 фол қайд этилгани ҳолда арбитр уч сариқ карточка билан чеклангани бироз ажабланарли. Бу огоҳлантиришларнинг барчаси мезбонларга берилди, жами қоидабузарликдан 16 таси уларнинг ҳиссасига тўғри келди.

Шу билан бирга, танаффусда алмаштирилган Маркинос ҳамда 76-дақиқагача ўйнай олган ва белидаги оғриқ туфайли майдонни тарк этган Мессининг жароҳатига рақиблар сабаб бўлмади. Лео ҳатто стандарт вазиятларни ижро эта олмади ва бу ҳуқуқни Ло Челсога топширди. Ва айнан унинг бурчакдан тўп узатишидан Аргентина Отамендининг голи кўринишида максимум натижа чиқариб олди. У эса голини трибуналарга формасидаги ЖЧ-2022 ғолиблиги учун қўйилган нашивкани намойиш этиш билан нишонлади.

Бразилия эса ўз вазиятларидан фойдалана олмади. Масалан, аргентиналикларнинг голидан бир неча дақиқа олдин Габриэл Мартинеллида жуда қулай вазият бўлганди. Якунда Бразилия тушунарсиз равишда қаторасига учинчи мағлубиятини тан олди.

Федерация раҳбари Эдналдо Родригеснинг келгусида Карло Анчелоттини таклиф этиш учун вақтинча бош мураббий билан ишлаш ғояси ўзини оқламаяпти. Бунинг барини Неймар ва Винисиус Жуниорнинг жароҳатига боғлаш тўғри эмас. Пентакампеонлар бошқа юлдузлари таркибда бўлиб ҳам икки оёғида оқсоқланмоқда. Аргентина эса оқсоқланган Месси билан «Маракана»да яна ғалаба қозонди. Ўйиндан кейин эса меҳмон фанатлар сектори қаршисига бориб, ғалабани биргаликда нишонлашди.

Аргентина бу ғалабадан кейин гуруҳда пешқадамликни сақлаб қолган, Уругвай Боливияга қарши ўйинда ғалабали юришини давом эттириб (3:0) иккинчи ўринда келмоқда. Олти ўйинда 7 очко тўплаган Бразилия ўзига хос бўлмаган 6-ўринда жойлашган.

Скалони пикда кетадими?

Бу ғалабадан каттароқ натижа эди. Қолаверса, бунгача ҳеч ким Бразилияни саралаш босқичида унинг майдонида мағлуб этмаган. Месси эса майдонга қайтиб, байрамга қўшилди ва ўзининг ўйиндан олдинги қарорини изоҳлади: «Биз одамларни қандай уришаётганига гувоҳ бўлдик. Биз кийим алмаштириш хонасига йўл олдик, чунки бу вазиятни тинчлантиришнинг энг яхши йўли эди, акс ҳолда фожиа рўй бериши мумкин эди».

Яхшики, нохуш ҳодиса рўй бермади. Лионел Скалонининг ўйиндан кейинги интервюсига эса кўпчилик эътибор қаратмади.

«Энди тўпни тўхтатиш ва ўйлашни бошлаш вақти келди. Бу футболчилар менга жуда кўп нарса беришди, мен эса ўз келажагим ҳақида ўйлашим керак. Бу хайрлашув эмас, аммо планка жуда юқори, у эса жуда кўп энергия талаб қилади, давом этиш ва ғалаба қозонишда давом этиш қийин. Ўйлаб олиш вақти келди. Чунки жамоага максимум энергияга эга ва барчаси жойида бўлган мураббий керак», — деди жамоасини унинг шарафига Скалонетта деб аташаётган мутахассис.

У жамоани фаолиятининг юқори чўққисида тарк этадими? Кўплар бунга жазм эта олмаган. Штабнинг «Маракана»даги тасвирлари эса хайрлашувга ишора бўлиб кўринди.