Ўзбек товарларининг Британияга экспорти ҳажми оширилади

Лондонда Ўзбекистон-Британия савдо-иқтисодий ҳамкорлигини янада кенгайтириш масалалари муҳокама қилинди.

Фото: Дунё

Ўзбекистон элчиси Равшан Усмонов Буюк Британия Бизнес ва савдо вазирлиги Экспорт ва савдо департаменти бош директори Найл Маккензи билан учрашди.

«Дунё» хабарига кўра, учрашув давомида икки томонлама савдо-иқтисодий ҳамкорликни янада жадаллаштиришнинг долзарб масалалари муҳокама қилинди.

Хусусан, 28-30 ноябр кунлари Лондон шаҳрида бўлиб ўтиши режалаштирилган Савдо ва саноат бўйича Ўзбекистон–Британия кенгашининг навбатдаги йиғилишини юқори даражада ташкил этиш ва ўтказишга келишиб олинди.

Найл Маккензи Ўзбекистон–Британия савдо-иқтисодий алоқаларини янада кенгайтириш, икки томонлама савдо айланмаси ҳажмини оширишда ўзаро тенг манфаатли ҳамкорликни олиб бориш, ўзбек товарларининг Британияга экспортини илгари суришда ҳамкорликка тайёрлигини билдирди.