Танзила Норбоева бошчилигидаги делегация Қозоғистонда халқаро конференцияда иштирок этди

Сенат раиси амалий ташрифи доирасида Қозоғистон Парламенти Сенати раиси Маулен Ашимбаев ҳамда Қозоғистон Парламенти Мажлиси раиси Ерлан Кошанов билан учрашувлар ўтказган.

Фото: Сенат ахборот хизмати

4 декабр куни Олий Мажлис Сенати раиси Танзила Норбоева бошчилигидаги Ўзбекистон делегацияси Остона шаҳрида 2023 йилда Марказий Осиё мамлакатлари аёллар мулоқотида Қозоғистон Республикасининг раислиги якунлари бўйича ўтказилган халқаро конференцияда иштирок этди. Бу ҳақда Сенат матбуот хизмати хабар берди.

Тадбир доирасида Марказий Осиё минтақасида гендер зўравонликка қарши курашиш ва аёллар ҳуқуқларини ҳимоя қилишда парламентлар ва фуқаролик жамиятининг ўрни ҳамда минтақада хотин-қизлар учун қонун устуворлиги каби мавзулар муҳокама қилинган. Йиғилишда сўзга чиққан Олий Мажлис Сенати раиси минтақа давлатларининг сўнгги 3 йилдаги фаол ҳамкорлиги ва муштарак фаолияти мулоқот муҳим майдонга айланганидан далолат эканини таъкидлаган.

“Бизнинг платформамиз гендер тенгликни таъминлашга қаратилган ягона тузилмага айланди. Бу иштирокчи мамлакатларни бир-бирига янада яқинлаштирди ва бутун минтақамиз учун умумий бўлган долзарб масалаларни биргаликда муҳокама қилиш имконини берди. Биз билан биргаликда хотин-қизларнинг нодавлат нотижорат ташкилотлари фаолияти ҳам фаоллашди. Уларнинг бугунги тадбир ишида кенг иштирок этиши минтақада хотин-қизларни бирлаштиришда юқори даражага эришилганидан далолатдир”, – деб қайд этган Танзила Норбоева.

Йиғилишда кун тартибидаги аёлларга нисбатан зўравонликнинг олдини олиш ва унга барҳам бериш, минтақада хотин-қизлар учун қонун устуворлигини таъминлаш каби масалаларда минтақавий ҳамкорликни ривожлантириш бўйича янги амалий чора-тадбирларни ишлаб чиқиш юзасидан фикр алмашилган. Мулоқотда раислик муддати бир йил бўлгани сабабли 2024 йилда уни бошқа давлатга ўтказиш масаласи ҳам кўриб чиқилиб, раислик Қирғиз Республикасига ўтган.

Марказий Осиё мамлакатлари етакчи аёллари мулоқоти минтақа парламентлари аёл аъзолари ўртасидаги ҳамкорликни ривожлантириш ва мустаҳкамлашнинг долзарб масалаларини муҳокама қилиш учун норасмий платформа ҳисобланади. Мулоқот БМТнинг Марказий Осиё учун превентив дипломатия бўйича минтақавий маркази, Бирлашган Миллатлар Ташкилотининг Тараққиёт Дастури ва “БМТ Аёллар” ташкилоти кўмагида ташкил этилган ва фаолият юритмоқда. Мулоқот расман 2020 йил декабр ойида иш бошлаган. 2021 йилда Ўзбекистон, 2022 йилда эса Туркманистон Марказий Осиё мамлакатлари етакчи аёллари мулоқотига раислик қилган.

Сенати раиси амалий ташриф доирасида Қозоғистон Республикаси Парламенти Сенати раиси Маулен Ашимбаев ҳамда Қозоғистон Республикаси Парламенти Мажлиси раиси Ерлан Кошанов билан учрашувлар ҳам ўтказган.

Учрашувларда икки давлат ўртасида юқори даражада эришилган келишувларни ҳуқуқий жиҳатдан таъминлаш учун қонун ижодкорлигига эътибор қаратиш ҳамда парламент назорати доирасида уларнинг ижросини таъминлашга кўмаклашишга келишиб олинган.